: अन्तर्राष्ट्रिय ऊर्जा निकाय (IEA) ले वर्तमान ऊर्जा संकटलाई 'अत्यन्तै गम्भीर' संज्ञा दिँदै विश्व अर्थतन्त्र ठुलो जोखिममा रहेको चेतावनी दिएको छ। आईईएका कार्यकारी निर्देशक फातिह बिरोलले सोमबार अस्ट्रेलियाको नेसनल प्रेस क्लबमा बोल्दै अहिलेको अवस्था सन् १९७३ र १९७९ को ऐतिहासिक तेल संकटभन्दा पनि चुनौतीपूर्ण रहेको उल्लेख गरे।
इरानले हर्मुज जलमार्ग बन्द गरेपछि यसमा निर्भर रहने एसियाली मुलुकहरू संकटको अग्रपङ्क्तिमा रहेका छन्। बिरोलका अनुसार यो समस्याको एकमात्र मुख्य समाधान हर्मुज व्यापार मार्ग खुला गर्नु नै हो। 'अहिले तेल र ग्यास मात्र होइन, विश्व अर्थतन्त्रका महत्वपूर्ण अङ्ग मानिने पेट्रोकेमिकल, रासायनिक मल, सल्फर र हिलियम जस्ता वस्तुको व्यापार समेत अवरुद्ध भएको छ, जसको गम्भीर असर विश्व अर्थतन्त्रमा पर्नेछ,' बिरोलले भने।
आईईएले विश्व बजारमा तेलको आपूर्ति बढाउन क्यानडा र मेक्सिकोसँग छलफल गरिरहेको छ। हालसम्म ४० करोड ब्यारेल तेल बजारमा पठाइसकिएको र आवश्यकता परे थप तेल र प्रशोधित उत्पादनहरू उपलब्ध गराउन सकिने उनले बताए । इरानी मिसाइल आक्रमणका कारण कतारको तरल प्राकृतिक ग्यास निर्यात रोकिएको छ। अस्ट्रेलिया र अन्य देशले केही हदसम्म सहयोग गरे पनि मध्यपूर्वबाट हुने अभावलाई पूर्ण रूपमा पूर्ति गर्न नसकिने उनको भनाइ छ।
क्षेत्रका ९ देशका कम्तीमा ४४ वटा ऊर्जा केन्द्रहरूमा गम्भीर क्षति पुगेको छ। बिरोलका अनुसार ऊर्जा बचाउनका लागि कोभिडको समयमा जस्तै उपायहरू अपनाउनुपर्ने र कम आय भएका गरिब राष्ट्रहरूले यसको मार सबैभन्दा बढी खेप्नुपर्ने देखिन्छ।
