: सुनसरीको धरानबाट प्रतिबन्धित लागूऔषध ब्राउन सुगर र प्रतिबन्धित औषधिसहित पाँच जनालाई प्रहरीले पक्राउ गरेको छ। शुक्रबार दिउँसो धरान उपमहानगरपालिका–१४ हात्तीसारपथस्थित एक घरबाट उनीहरूलाई पक्राउ गरिएको इलाका प्रहरी कार्यालय धरानका डिएसपी भीषणबाबु राईले बताए ।
वडा प्रहरी कार्यालय धरानका प्रमुख प्रहरी वरिष्ठ नायब निरीक्षक सन्दीप कार्कीको कमान्डमा खटिएको प्रहरी टोलीले राजकुमार डंगोलको घरमा डेरा गरी बस्ने पाँच जनालाई नियन्त्रणमा लिएर लागूऔषध बरामद गरेको डिएसपी राईले जानकारी दिए। प्रहरीले उनीहरूको साथबाट १२४ ग्राम ४७ मिलिग्राम ब्राउन सुगर, नाइट्रोजन ४४५ ट्याब्लेट, स्पास्पेन ६५ ट्याब्लेट र ट्रामाडोल १५ क्याप्सुलसमेत बरामद गरेको जनाएको छ ।
पक्राउ पर्नेमा धरान–१५ का २५ वर्षीय सौरभ जिमी, धरान–२० का २२ वर्षीय सुगम राई, धरान–१४ का २१ वर्षीय अविजित निरौला, धरान–१३ का २५ वर्षीय आशिष राई र मोरङको लेटाङ नगरपालिका–१ का २६ वर्षीय हरि लिम्बू रहेको डिएसपी राईले बताए । उनीहरूको साथबाट तीन थान मोटरसाइकल र नौ थान मोबाइल बरामद गरी आवश्यक अनुसन्धान तथा कानुनी कारबाहीका लागि इलाका प्रहरी कार्यालय धरानको हिरासतमा राखिएको प्रहरीले जनाएको छ ।