मुख्य समाचार
रिपब्लिकन उम्मेदवारहरूलाई चुनावमा सघाउन ठूलो रकम खर्च गर्नु आफ्नो मूर्खता भएको
रिपब्लिकन उम्मेदवारहरूलाई चुनावमा सघाउन ठूलो रकम खर्च गर्नु आफ्नो मूर्खता भएको

। अर्बपति व्यापारी एलन मस्कले रिपब्लिकन उम्मेदवारहरूलाई चुनावमा सघाउन ठूलो रकम खर्च गर्नु आफ्नो मूर्खता भएको बताएका छन् । उनले आफू अमेरिकी राष्ट्रपति डोनाल्ड ट्रम्पको ‘मेक अमेरिका ग्रेट अगेन’ (मागा) अभियानको हिस्सा नरहेको पनि स्पष्ट पारेका छन् ।

सन् २०२४ को राष्ट्रपतीय निर्वाचनमा ट्रम्पका सबैभन्दा ठूला समर्थकमध्ये एक रहेका मस्कले पछिल्लो समय आफ्नो राजनीतिक समर्थनबारे फरक धारणा सार्वजनिक गरेका हुन् ।

न्युयोर्क टाइम्सका स्तम्भकार एन्ड्रु रस सोर्किनसँग डिलबुक समिटमा भएको अन्तर्वार्तामा मस्कले आफू मागा अभियानको सदस्य नभएको बताएका हुन् । चीनबाट भिडियो कलमार्फत कार्यक्रममा सहभागी भएका उनले भने, ‘म मागा होइन ।’

रिपब्लिकन पार्टीका नीतिलाई अन्धाधुन्ध समर्थन नगर्ने बताउँदै उनले भने, ‘मागाको अर्थ रिपब्लिकन पार्टीका नीतिहरूको अन्धाधुन्ध पालना गर्नु हो भने म त्यस्तो होइन ।’


मस्कको पछिल्लो भनाइ सन् २०२४ को चुनावताका उनले व्यक्त गरेको धारणाभन्दा फरक छ । त्यतिबेला न्युयोर्कको म्याडिसन स्क्वायर गार्डेनमा आयोजित ट्रम्पको चुनावी र्‍यालीमा उनले आफूलाई ‘डार्क, गोथिक मागा’ समेत भनेका थिए ।

अन्तर्वार्तामा मस्कले अमेरिकी चुनावमा रिपब्लिकन उम्मेदवारहरूलाई सघाउन गरेको ठूलो आर्थिक लगानीबारे पनि आत्मालोचना गरे । सन् २०२६ को मध्यावधि निर्वाचनमा रिपब्लिकन उम्मेदवारहरूलाई सहयोग गर्न करिब ५० करोड डलर खर्च गरेकोमा आफूलाई मूर्ख लागेको उनले बताए । उनले आर्थिक सहयोग गरेका धेरै उम्मेदवार चुनावमा पराजित भएका थिए ।

‘यदि मैले समयलाई पछाडि फर्काउन सक्ने भए कम पैसा खर्च गर्ने थिएँ,’ उनले भने, ‘यसले अमेरिकी चुनाव पैसाको मात्र खेल होइन भन्ने देखाउँछ ।’

द गार्जियनका अनुसार मस्कले सन् २०२४ को राष्ट्रपतीय निर्वाचनमा ट्रम्पलाई जिताउन कम्तीमा २५ करोड डलर चन्दा दिएका थिए । निर्वाचनमा ट्रम्प विजयी भएपछि मस्क सन् २०२५ मा उनको प्रशासनमा सहभागी भएका थिए ।

उनले सरकारी खर्च कटौती गर्ने उद्देश्यले स्थापना गरिएको डिपार्टमेन्ट अफ गभर्मेन्ट इफिसियन्सी (डीओजीई) को नेतृत्व गरेका थिए । उक्त जिम्मेवारीमा उनी १८० दिन रहे । पछि ट्रम्पसँग सार्वजनिक रूपमा मतभेद बढेपछि उनी प्रशासनबाट बाहिरिएका थिए ।

ट्रम्पको चुनावी अभियानमा खुलेर साथ दिएका र उनको प्रशासनमै महत्त्वपूर्ण जिम्मेवारी सम्हालेका मस्कको पछिल्लो अभिव्यक्तिलाई अमेरिकी राजनीतिमा उनको बदलिँदो सम्बन्ध र दृष्टिकोणका रूपमा हेरिएको छ ।

प्रतिक्रिया दिनुहोस्
अन्य समाचारहरु
। बंगलादेशमा पूर्वप्रधानमन्त्री शेख हसिनाको स्वदेश फर्किने घोषणापछि राजनीतिक तनाव चुलिएको छ । प्रतिबन्धित अवामी लिगले आह्वान गरेको ‘लकडाउन’ अघि र पछि राजधानी ढाकासहित देशका विभिन्न स्थानमा बम विस्फोट, आगजनी र झडपका घटना भएका छन् । घटनामा मानवीय क्षतिसमेत भएको बंगलादेशका सञ्चारमाध्यमहरुले जनाएका छन् । पछिल्ला दुई दिनमा सिलहट, राजशाही, बारीसाल र फरीदपुरमा अन्तरिम सरकारका पूर्वप्रमुख मोहम्मद ...
। खडेरी, बाढी तथा हिंसात्मक घटनाका कारण सोमालियामा आन्तरिक विस्थापन बढ्दै गएको छ । यसले देशको मानवीय संकटसमेत थप गहिरो बनाएको संयुक्त राष्ट्रसंघीय मानवीय मामिला समन्वय कार्यालय (ओसीएचए) ले जनाएको छ । ओसीएचएका अनुसार सोमालियाभर हाल ३३ लाखभन्दा बढी मानिस विस्थापित अवस्थामा छन्। विस्थापित हुनेमा अधिकांश महिला, बालबालिका तथा ज्येष्ठ नागरिक रहेका छन् । संयुक्त राष्ट्रसंघीय ...
। न्युजिल्यान्डको कमर्स कमिसनले व्यवसायमा कृत्रिम बुद्धिमत्ता (एआई) को प्रयोग गर्दा प्रतिस्पर्धा तथा उपभोक्ता संरक्षणसम्बन्धी कानुनी व्यवस्था कसरी लागू हुन्छ भन्ने विषयमा नयाँ निर्देशिका जारी गरेको छ । कमर्स कमिसनकी उपाध्यक्ष एनी क्यालिननले बुधबार जारी गरेको विज्ञप्तिमा एआईले व्यवसाय सञ्चालनको शैलीमा परिवर्तन ल्याए पनि यसले व्यवसायको कानुनी दायित्वमा कुनै परिवर्तन नगर्ने बताएका छन् । उनका अनुसार ...
: अमेरिकी राष्ट्रपति डोनाल्ड ट्रम्प, रुसी राष्ट्रपति भ्लादिमिर पुटिन र चिनियाँ राष्ट्रपति सी चिनफिङ पहिलोपटक एकसाथ सार्वजनिक मञ्चमा देखिएका छन् । एसिया–प्रशान्त आर्थिक सहयोग (एपेक) शिखर सम्मेलनका क्रममा चीनको सेन्जेनमा बुधबार राति आयोजित स्वागत रात्रिभोज (गाला डिनर) अघि तीनै नेता रेड कार्पेटमा सँगै उभिएका हुन्। रुसको क्रेमलिन प्रेस टोलीले टेलिग्राममार्फत सार्वजनिक गरेको भिडियोमा विश्वका तीन शक्तिशाली ...
। अमेरिकी राष्ट्रपति डोनाल्ड ट्रम्पले फिलिपिन्ससँग रक्षा तथा ऊर्जा क्षेत्रमा सहकार्य विस्तार गर्ने बताएका छन् । उनले फिलिपिन्सको पहिलो आधुनिक आणविक ऊर्जा परियोजनामा अमेरिकी प्रविधि उपयोग गर्न सकिने उल्लेख गरे। राष्ट्रपति फर्डिनान्ड मार्कोस जुनियरले बुधबार मनिलास्थित राष्ट्रपति भवनमा ट्रम्पलाई सैनिक टुकडी र ब्यान्डसहित स्वागत गर्नुभएको थियो । भ्रमणका क्रममा करिब एक हजार प्रदर्शनकारीले अमेरिकी नीतिको विरोध गर्दै ...