: नेपाल र इस्टोनियाबीच डिजिटल रूपान्तरण तथा विद्युतीय शासनका क्षेत्रमा द्विपक्षीय सहकार्य विस्तार गर्ने विषयमा छलफल भएको छ ।
सूचना तथा सञ्चारमन्त्री डा. विक्रम तिमिल्सिना र इस्टोनियाकी न्याय तथा डिजिटल मामिलामन्त्री लिजा पाकोस्टाबीच कतारको दोहामा भएको भेटवार्तामा यस्तो छलफल भएको हो ।
अन्तर्राष्ट्रिय दूरसञ्चार संघ (आईटीयू) को विश्व दूरसञ्चार नीति मञ्च २०२६ मा सहभागी हुने क्रममा भएको भेटमा डिजिटल सार्वजनिक पूर्वाधार, विद्युतीय शासन प्रणाली, साइबर सुरक्षा तथा संस्थागत क्षमता अभिवृद्धिका विषयमा सहकार्य गर्ने सम्भावनाबारे छलफल भएको थियो ।
भेटमा मन्त्री तिमिल्सिनाले डिजिटल सुशासनमा इस्टोनियाले हासिल गरेको उपलब्धिको प्रशंसा गर्दै नेपालको सार्वजनिक सेवा प्रवाहलाई प्रविधिमैत्री, पारदर्शी र नागरिककेन्द्रित बनाउन त्यहाँको अनुभव उपयोगी हुने बताए ।
उनले डिजिटल पहिचान, विद्युतीय हस्ताक्षर, सुरक्षित तथ्याङ्क आदानप्रदान तथा सरकारी सेवा प्रणालीको अन्तरआबद्धतामा सहकार्य गर्न सकिने धारणा राखे ।
त्यसैगरी, डिजिटल प्रविधिमा विकसित र विकासोन्मुख मुलुकबीच बढ्दै गएको असमानता न्यूनीकरण गर्न इस्टोनियाले अन्तर्राष्ट्रिय दूरसञ्चार संघमार्फत सक्रिय भूमिका निर्वाह गर्नुपर्नेमा उनले जोड दिए ।
जवाफमा इस्टोनियाकी मन्त्री पाकोस्टाले नेपालसँग डिजिटल रूपान्तरण र विद्युतीय शासनका क्षेत्रमा सहकार्य तथा अनुभव आदानप्रदान गर्न प्रतिबद्धता व्यक्त गरिन् ।
नेपाल र इस्टोनियाबीच सहकार्य विस्तार हुन सके सार्वजनिक सेवा प्रवाहमा प्रभावकारिता, पारदर्शिता र नागरिकको डिजिटल सेवामा पहुँच बढ्ने अपेक्षा गरिएको छ ।
