: वीरगन्ज–४, वीर्तास्थित वीरगन्ज कारागारबाट बिहीबार बिहान फरार भएका कैदी पक्राउ परेका छन्। जबरजस्ती करणी कसुरमा विगत ११ वर्षदेखि कैद सजाय भुक्तान गरिरहेका पर्साको पोखरिया नगरपालिका वडा नं. ४ का ३० वर्षीय सुनील साह तुराहा बिहीबार बिहान कारागारबाट भागेका थिए।
तुराहालाई बाराको सीमावर्ती क्षेत्र भारतको बिहार राज्यस्थित आदापुरबाट बिहीबारै दिउँसो भारतीय प्रहरीको सहयोगमा नियन्त्रणमा लिइएको पर्साका प्रहरी नायब उपरीक्षक चक्रबहादुर मल्लले जानकारी दिए। उनलाई जिल्ला प्रहरी कार्यालयको हिरासतमा राखेर थप अनुसन्धान भइरहेको मल्लले बताए।
प्रहरी नायब उपरीक्षक मल्लका अनुसार बिहीबार बिहान कारागारभित्र सरसफाइको काम चलिरहेका बेला साह कारागारको पर्खाल नाघेर फरार भएका थिए।
उक्त जानकारी प्राप्त हुनासाथ तालिमप्राप्त कुकुरको सहयोगमा प्रहरीको टोली वीरगन्जका विभिन्न स्थानमा परिचालन गरिएको थियो।
