इरानका राष्ट्रपति मसुद पेजेस्कियानले अमेरिकाले नयाँ सैन्य क्षमताको धम्की दिएर कूटनीति अघि बढाउन खोजेको आरोप लगाएका छन् ।
उनले अमेरिकाले इरानलाई आणविक हतियार प्राप्त गर्नबाट रोक्न युद्ध गरेको दाबी गरेपनि युद्धको पहिलो दिन नै इरानको लामेर्दस्थित खेलकुद हलमा आक्रमण गर्न प्रेसिजन स्ट्राइक मिसाइल (पीआरएसएम) प्रयोग गरेको बताए ।
उक्त आक्रमणमा २१ जना सर्वसाधारणको मृत्यु भएको थियो ।
पेजेस्कियानले इरानको भूमिगत आणविक केन्द्रमा आक्रमण गर्न अमेरिकाको रक्षा मन्त्रालयले ‘मदर अफ अल बम्स’ अर्थात् सबैभन्दा शक्तिशाली बम प्रयोग गर्नेबारे विचार गरिरहेको भन्ने अमेरिकी सञ्चारमाध्यमका समाचारप्रति पनि आपत्ति जनाएका छन् ।
‘यो कुनै विरोधाभास होइन, बरु लज्जास्पद कुरा हो,’ उनले भनेका छन्, ‘विश्व शान्ति र सुरक्षालाई कसले धम्की दिइरहेको छ ?’
उनको यो अभिव्यक्ति अमेरिकाले इरानविरुद्ध सैन्य कारबाहीको सम्भावना र शक्तिशाली हतियार प्रयोगबारे चर्चा गरिरहेका बेला आएको हो ।
