: कञ्चनपुरको बेलडाँडी गाउँपालिका–२, शुक्लाफाँटा आरक्ष जंगलस्थित सडकखण्डमा अटो र स्कुटर एकआपसमा ठोक्किएर दुर्घटना हुँदा एक बालकसहित सात जना घाइते भएका छन्। घाइतेमध्ये दुई जनाको अवस्था गम्भीर रहेको छ।
दैजीबाट बेलडाँडीतर्फ आउँदै गरेको सु.प.प्र.०२–००४ प ६५६५ नम्बरको स्कुटर र बेलडाँडीबाट दैजीतर्फ जाँदै गरेको भि.न.पा. ००१ ह ५२२ नम्बरको अटो आपसमा ठोक्किएर उक्त दुर्घटना भएको हो।
दुर्घटनामा अटो चालक, अटोमा सवार यात्रु तथा स्कुटर चालक र उनका छोरा गरी सात जना घाइते भएका हुन्। घाइते हुनेहरुमा स्कुटर चालक बेलडाँडी गाउँपालिका–२ का ४० वर्षीय दिनेश खाती , उनका छोरा ६ वर्षीय अथर्क खाती, बेलडाँडी गाउँपालिका–१ सिद्धचोकका ४५ वर्षीय अटो चालक ललित सिँह ठकुराठी, अटो चालकका छोरा १८ वर्षीय हिक्मत ठकुराठी, सोही ठाउँकी ३६ वर्षीया सुशिला ठकुराठी, उनकी छोरी १६ वर्षीया आशिका ठकुराठी र सोही ठाउँका २५ वर्षीया शोभा डाँगा रहेका छन्।
उनीहरुमध्ये अटो चालक र स्कुटर चालकका छोराको अवस्था गम्भीर रहेको छ। घाइतेहरुको विभिन्न अस्पतालमा उपचार भइरहेको छ। घटनाबारे थप अनुसन्धान भइरहेको प्रहरीले जनाएको छ।
