: प्रतिनिधिसभाका सभामुख डोलप्रसाद अर्यालले नेपाल संवत्लाई सरकारी कामकाज, सार्वजनिक अभिलेख, शैक्षिक क्षेत्र र डिजिटल प्रणालीमा प्रयोग विस्तार गर्नुपर्ने बताएका छन्।
नेपाल संवत् ११४७ का अवसरमा मंगलबार भक्तपुरमा नेपाल संवटका प्रवर्तक राष्ट्रिय विभूति शंखधर साख्वाःको प्रतिमामा माल्यार्पण गर्दै सभामुख अर्यालले सरकारी कामकाज, सार्वजनिक अभिलेख, शैक्षिक क्षेत्र र डिजिटल प्रणालीमा यसको प्रयोग विस्तार गर्न सरकारले स्पष्ट नीति, आवश्यक बजेट र प्रभावकारी कार्ययोजना बनाउनुपर्ने धारणा राखे।
उनले नेपाल संवत्लाई राष्ट्रिय मान्यता प्रदान गरिनु महत्त्वपूर्ण उपलब्धि भएकाले यसलाई घोषणामा मात्र सीमित राख्न नहुने बताए। शंखधर साख्वाःको जीवनले व्यक्तिगत स्वार्थभन्दा माथि उठेर सार्वजनिक हितका लागि काम गर्नुपर्ने महत्त्वपूर्ण सन्देश दिने उनको भनाइ थियो। साख्वाःको योगदानलाई राष्ट्रिय तथा अन्तर्राष्ट्रिय स्तरमा चिनाउने र नेपाल भाषा तथा नेपाल लिपिको संरक्षण गर्ने जिम्मेवारीबाट राज्य विमुख हुन नहुनेमा उनले जोड दिए।
सभामुख अर्यालले इतिहास र संस्कृतिको संरक्षण गर्ने, सार्वजनिक जीवनमा इमानदारी र जवाफदेहिता कायम गर्ने तथा विविधताबीचको एकता र सामाजिक सद्भावलाई अझ बलियो बनाउने संकल्प सबैले गर्नुपर्ने बताए।
