: आमाछोदिङमो गाउँपालिका–१ हाकुबेसी गाउँका १५६ घर उच्च जोखिममा परेकोले बस्ती अन्यत्र सार्न स्थानीयले माग गरेका छन् ।
स्थानीय अगुवा निमाकैसाङ तामाङका अनुसार बाढीका कारण गाउँ मुनिबाट नदीले काटेर हाकुबेसी गाउँ पुरै जोखिममा परेकोले बस्ती अन्यत्र सार्न प्रमुख जिल्ला अधिकारीमार्फत समुदायको लिखित माग गरिएको हो । त्यहाँ रहेको एक विद्यालय र प्रहरी चौकी पनि जोखिममा रहेका छन् ।
भोटेकोशी बाढीका कारण सम्पर्कविहीन वा बेपत्ता भएका व्यक्तिहरूको विवरण यकिन गर्ने सम्बन्धमा छलफल गरिएको छ । बैठकले रसुवाका स्थानीय तहहरूका वडा कार्यालयमा प्राप्त निवेदनका आधारमा सम्बन्धित स्थानीय विपद् जोखिम न्यूनीकरण तथा व्यवस्थापन समितिले गरेको निर्णय अनुसार उक्त विवरणलाई औपचारिक रूपमा अनुमोदन गरी राष्ट्रिय विपद् जोखिम न्यूनीकरण तथा व्यवस्थापन प्राधिकरण, सिंहदरबारमा सिफारिस गर्ने निर्णय गरेको छ ।
बाढीका कारण नदी कटान र पहिरोको जोखिममा परेकोले सरकारले सुरक्षित आवासको अधिकार दिनुपर्ने बताउँदै आमाछोदिङमो गाउँपालिका अध्यक्ष बुचुङ तामाङले बाढीपछि गाउँ पहिरोको जोखिममा रहेकोले अन्यत्र सर्नुपर्ने बताए।
प्रमुख जिल्ला अधिकारी कमलप्रसाद पाण्डेले भूगर्भविद्ले अध्ययन गरेपछि उक्त विषयमा निर्णय लिने जानकारी दिए । भोटेकोशी बाढीमा बेपत्ता तथा सम्पर्कविहीन नागरिकको वडा तहमा प्राप्त निवेदनका आधारमा राष्ट्रिय विपद् जोखिम न्यूनीकरण तथा व्यवस्थापन प्राधिकरण, सिंहदरबारमा सिफारिस गर्ने निर्णय भएको पनि उनले बताए ।
