: झापाका सीमा नाकाबाट अवैध रूपमा नेपाल भित्राइएको ठूलो मात्रामा बारुदजन्य पटाका सशस्त्र प्रहरीले बरामद गरेको छ।
सशस्त्र प्रहरी बल, नेपाल नम्बर २ गण हेडक्वार्टर झापाले बरामद गरेको करिब २३ लाख ५९ हजार रुपैयाँ बराबरका पटाका शुक्रबार दिउँसो गणभित्रै नष्ट गरेको छ। बरामद गरिएका पटाका सशस्त्र प्रहरी बल नेपाल नम्बर २ गणका गणपति सशस्त्र प्रहरी उपरीक्षक (एसपी)सचिन कर्माचार्य, भद्रपुर नगरपालिका वडा नम्बर ८ का वडाध्यक्ष मनोज सुब्बा, जिल्ला प्रशासन कार्यालय तथा जिल्ला प्रहरी कार्यालय झापाका प्रतिनिधि र सञ्चारकर्मीहरूको उपस्थितिमा नष्ट गरिएको थियो।
तिहार तथा छठ पूजालाई लक्षित गरी भारतबाट नेपाल भित्राइएको सो मुल्य बराबरको पटाका सशस्त्र प्रहरीले विभिन्न मिति र समयमा जिल्लाका विभिन्न स्थानमा सञ्चालन गरेको चेकजाँच तथा सीमा निगरानीका क्रममा बरामद गरेको एसपी कर्माचार्यले जानकारी दिए। विशेषगरी तिहार तथा छठ पर्वका समयमा पटाका र आतसबाजीको प्रयोग बढ्ने भएकाले यसबाट हुन सक्ने आगलागी, मानवीय दुर्घटना, धनजनको क्षति, ध्वनि प्रदूषण तथा वातावरणीय प्रदूषणलाई मध्यनजर गर्दै अवैध रूपमा ओसारपसार तथा बिक्री वितरण गरिने यस्ता सामग्री नियन्त्रण गर्ने अभियानलाई तीव्रता दिइएको एसपी कर्माचार्यले बताए।
बारुदजन्य सामग्रीको अनियन्त्रित प्रयोगले बालबालिका, ज्येष्ठ नागरिक तथा सर्वसाधारणको स्वास्थ्य र सुरक्षामा प्रतिकूल असर पार्नुका साथै आगलागी तथा अन्य दुर्घटनाको जोखिमसमेत बढाउने भएकाले यस्ता सामग्री प्रयोग नगर्न उनले सर्वसाधारणलाई आग्रह समेत गरेका छन्।
