: बुढानीलकण्ठ नगरपालिका र चाबहिलस्थित हेल्पिङ ह्यान्ड्स सामुदायिक अस्पतालबीच नगरवासीलाई सहुलियतमा स्वास्थ्य सेवा उपलब्ध गराउने विषयमा सहकार्य भएको छ।
नगरपालिकाभित्र स्थायी बसोबास गर्ने नागरिक, नगरपालिकाको स्वास्थ्य चौकी तथा नगर अस्पतालबाट प्रेषण गरिएका बिरामी र नगरपालिकाअन्तर्गतका कार्यालयमा कार्यरत कर्मचारीलाई स्वास्थ्य सेवामा छुट उपलब्ध गराउने गरी दुई पक्षबीच सम्झौता भएको हो।
सम्झौताअनुसार अस्पतालले नगरपालिकाको सिफारिस वा स्वास्थ्य चौकी तथा नगर अस्पतालको प्रेषण पत्रका आधारमा बिरामीलाई विभिन्न स्वास्थ्य सेवा तथा सुविधा उपलब्ध गराउनेछ।
सम्झौतामा ओपीडी सेवाअन्तर्गत जनरल सेवामा ५० प्रतिशत र अन्य सेवामा २० प्रतिशत छुट दिने उल्लेख छ। त्यस्तै जनरल बेडमा ४० प्रतिशत छुट उपलब्ध गराइनेछ।
त्यस्तै नगरपालिकाले आफ्नो क्षेत्रभित्र सञ्चालन गर्ने स्वास्थ्यसम्बन्धी कार्यक्रममा आवश्यकताअनुसार अस्पतालले सहयोग गर्ने सम्झौतामा उल्लेख छ।
दुई पक्षबीच भएको सम्झौता २०८३ कात्तिक २० गतेदेखि लागू भई पाँच वर्षसम्म कायम रहनेछ। प्रत्येक पाँच वर्षमा दुवै पक्षको आपसी सहमतिमा सम्झौता नवीकरण गर्न सकिने व्यवस्था गरिएको छ।
