: पोर्चुगलका कप्तान तथा स्टार फुटबलर क्रिस्टियानो रोनाल्डोले अन्तर्राष्ट्रिय फुटबलबाट संन्यास लिने घोषणा गरेका छन्।
४१ वर्षीय रोनाल्डोले सामाजिक सञ्जाल इन्स्टाग्राममार्फत राष्ट्रिय टोलीबाट आफ्नो २३ वर्ष लामो यात्रा टुंग्याउने निर्णय सार्वजनिक गरेका हुन्।
सन् २००३ मा पोर्चुगलको राष्ट्रिय टोलीबाट डेब्यु गरेका रोनाल्डोले देशका लागि २३४ खेल खेल्दै कीर्तिमानी १४६ गोल गरेका छन्। अन्तर्राष्ट्रिय फुटबलमा सर्वाधिक खेल खेल्ने र सर्वाधिक गोल गर्ने दुवै कीर्तिमान उनकै नाममा छन्।
‘पोर्चुगलका जनताका लागि राष्ट्रिय टोलीको सात नम्बर जर्सी फिर्ता गर्ने समय आएको छ,’ रोनाल्डोले इन्स्टाग्राममा सार्वजनिक गरेको भिडियोमा भनेका छन्, ‘२३ वर्षसम्म यो जर्सी लगाउने, यसको रक्षा गर्ने र विश्वभरका रंगशालामा यसलाई बोकेर हिँड्ने अवसर पाउनु मेरो लागि ठूलो सौभाग्य र जिम्मेवारी थियो।’
उनले आफ्नो निर्णय सहज नभएको उल्लेख गर्दै यो यात्रा सन् २००३ को अगस्टमा सुरु भएको र यसले आफ्नो जीवन नै परिवर्तन गरेको बताएका छन्।
यसअघि गत सेप्टेम्बरमा डेनमार्कविरुद्धको नेसन्स लिग खेलमा सुरुआती टोलीमा नराखिने जानकारी पाएपछि रोनाल्डोले पोर्चुगलको राष्ट्रिय टोलीको प्रशिक्षण शिविर छाडेका थिए।
पोर्चुगलले आगामी नोभेम्बरमा नेसन्स लिगअन्तर्गत घरेलु मैदानमा डेनमार्क र अवे मैदानमा वेल्ससँग खेल्ने तालिका छ। ती खेलका लागि पोर्चुगलले शुक्रबार टोली घोषणा गर्ने तयारी गरेको छ।
रोनाल्डोको सन्यास घोषणापछि पोर्चुगल फुटबल महासंघले उनको योगदानको उचित सम्मानसहित बिदाइ गर्ने इच्छा व्यक्त गरेको छ।
महासंघले विज्ञप्ति जारी गर्दै रोनाल्डोको अतुलनीय फुटबल यात्राको सम्मानमा विशेष कार्यक्रम आयोजना गर्ने जनाएको छ। समर्थक र सम्पूर्ण देशले उनलाई फेरि एकपटक सम्मान र अभिनन्दन गर्न पाउनुपर्ने महासंघको भनाइ छ।
