: अमेरिकी राष्ट्रपति डोनाल्ड ट्रम्पले अमेरिका र एसियाका सेयर बजारमा आएको भारी गिरावटका लागि सर्वसाधारण जनतालाई जिम्मेवार ठहराएका छन्।
सामाजिक सञ्जाल ‘ट्रुथ सोसल’मा एक पोस्ट गर्दै उनले लेखेका छन्, 'डेमोक्रेटिक पार्टीले मंगलबार ठूलो जित हासिल गरेकै कारण आज सेयर बजार ओरालो लागेको हो। यो देख्दा अत्यन्तै दुःख लाग्छ। यसका लागि तपाईंहरू स्वयं जिम्मेवार हुनुहुन्छ।'
अर्को पोस्टमा उनले अगाडि लेखेका छन्, 'निर्वाचन परिणामका आधारमा सेयर बजारको इतिहासकै यो सबैभन्दा खराब दिनमध्ये एक बन्यो। बजारलाई पहिले कहिल्यै नपुगेको उचाइमा पुर्याउन निकै मिहिनेत गरिएको थियो, तर अन्ततः यो स्थिति आयो। यसले गर्दा तपाईंहरूको रिटायर्मेन्ट (अवकाश) खाताको रकम समेत घटेको छ।'
उनले थप लेखेका छन्, 'याद राख्नुहोस्, यसका लागि रिपब्लिकन होइन, डेमोक्र्याटहरू जिम्मेवार छन्। यद्यपि चिन्ता नगर्नुहोस्, हामी छिटै कुनै न कुनै रूपमा पहिलेभन्दा अझ ठूलो र बलियो भएर अघि बढ्नेछौँ।'
यसअघि अमेरिकी मिडटर्म चुनावपछि सेयर बजारमा आएको तीव्र गिरावटका कारण अमेरिका र एसियाका प्रमुख टेक (प्रविधि) कम्पनीहरूको करोडौँ डलर नोक्सान भएको छ।
आर्टिफिसियल इन्टेलिजेन्स (एआई) को विकास गति सुस्त हुने आशंकालाई यसको मुख्य कारण मानिएको छ। एआई विकासको गति धीमा बनाउने एजेन्डासहित चुनाव लडेका डेमोक्रेटिक उम्मेदवारहरू विजयी भएपछि प्रविधि तथा एआई क्षेत्रका कम्पनीहरूको सेयर मूल्यमा भारी गिरावट आएको हो।
