: संयुक्त राज्य अमेरिकामा सम्पन्न मध्यावधि चुनावले देशको राजनीतिमा समावेशिता र विविधताको नयाँ इतिहास रचेको छ। विभिन्न राज्यहरूबाट चुनावी मैदानमा उत्रिएका महिला, अश्वेत, मुस्लिम तथा आदिवासी उम्मेदवारहरूले ऐतिहासिक जित हासिल गर्दै अमेरिकी नीति निर्माणको तहमा सीमान्तकृत समुदायको उपस्थिति बलियो बनाएका छन्।
अमेरिकी राजनीतिमा समावेशिता र विविधताको नयाँ आयाम थपेका मुख्य ५ ऐतिहासिक परिणामहरू यस्ता छन् ।
देशले पायो पहिलो अश्वेत महिला गभर्नर : डेमोक्र्याटिक पार्टीकी उम्मेदवार एवम् एटलान्टाकी पूर्वमेयर केइशा लान्स बटम्स जर्जियाको गभर्नरमा निर्वाचित भएकी छन्। यो जितसँगै उनी संयुक्त राज्य अमेरिकाको इतिहासमै पहिलो अश्वेत महिला गभर्नर बन्न सफल भएकी छन्।
अमेरिकी सिनेटमा पहिलो मुस्लिम सदस्य : मिशिगनबाट सिनेट सदस्यका लागि भएको कडा प्रतिस्पर्धामा अब्दुल एल-सयदले रिपब्लिकन उम्मेदवार माइक रोजर्सलाई पराजित गरेका छन्। यो जितसँगै अब्दुल एल-सयद अमेरिकी सिनेट (माथिल्लो सदन) मा पुग्ने पहिलो मुस्लिम सदस्य बनेका छन्।
ओहायो र टेक्सासमा पहिलो महिला गभर्नर: ओहायोमा डेमोक्र्याट उम्मेदवार डा. एमी एक्टनले रिपब्लिकनका विवेक रामास्वामीलाई पराजित गर्दै राज्यको पहिलो महिला गभर्नरको इतिहास रचेकी छिन्। त्यसैगरी, तीव्र प्रतिस्पर्धाका बिच टेक्सासमा जीना हिनोजोसा विजयी भई राज्यको पहिलो 'ल्याटिना' (हिस्पानिकरल्याटिन अमेरिकी मूलकी) महिला गभर्नर बनेकी छिन्।
आदिवासी अमेरिकी समुदायको ऐतिहासिक विजय : पूर्व अमेरिकी गृहमन्त्री डेब हालान्ड न्यु मेक्सिकोको गभर्नर पदमा निर्वाचित भएकी छिन्। उनी न्यु मेक्सिकोको पहिलो आदिवासी अमेरिकी गभर्नर बनेकी छिन्। यस्तै मिनेसोटाकी पेगी फ्लानागनले सिनेट चुनाव जित्दै अमेरिकी सिनेटमा प्रतिनिधित्व गर्ने पहिलो आदिवासी अमेरिकी महिलाको कीर्तिमान बनाएकी छिन्।
क्यालिफोर्निया, विस्कॉन्सिन र फ्लोरिडामानयाँ कीर्तिमान : क्यालिफोर्नियामा जेभियर बेसेरा राज्यको पहिलो निर्वाचित ल्याटिनो गभर्नर बनेका छन्। त्यसैगरी, विस्कॉन्सिनमा क्रिस क्राउली राज्यको पहिलो अश्वेत गभर्नर चुनिएका छन् भने फ्लोरिडामा रिपब्लिकन नेता बायरन डोनाल्ड्स राज्यकै पहिलो अश्वेत गभर्नर बनेका छन्। यस्तै, न्यु ह्याम्पशायरका क्रिस पप्पास अमेरिकी सिनेटमा पुग्ने पहिलो खुला समलिङ्गी पुरुष बनेका छन्। उता टेनेसी राज्यमा रिपब्लिकन उम्मेदवार मार्शा ब्ल्याकबर्न विजयी हुँदै राज्यको पहिलो महिला गभर्नर बनेकी छन्।
यी परिणामहरूले अमेरिकी राजनीति र नीति निर्माणको तहमा महिला तथा सीमान्तकृत समुदायको पहुँच र उपस्थिति तीव्र रूपमा बढ्दै गएको पुष्टि गरेको छ। जसले अमेरिकी राजनीतिमा विद्यमान परम्परागत शक्ति संरचनालाई चुनौती दिँदै विविधता नै अमेरिकाको वास्तविक सामर्थ्य हो भन्ने सन्देश दिएका छन्।
