: वैदेशिक रोजगारीका लागि नयाँ श्रम गन्तव्यको रूपमा मौरिससमा वैदेशिक रोजगारीको प्रक्रिया सुरु हुँदैछ। रोजगारदाताले नै सम्पूर्ण लागत खर्च व्यहोर्ने सिद्धान्तअनुसार वैदेशिक रोजगारीको अवसर विस्तार गर्ने उद्देश्यले सरकारले मौरिससलाई नयाँ श्रम गन्तव्यका रूपमा अगाडि सारेको छ। मौरिससमा नयाँ श्रम गन्तव्य सुरु गर्ने सरकारको तयारीमा वैदेशिक रोजगार व्यवसायीहरू भने असन्तुष्ट देखिएका छन्।
नेपाल वैदेशिक रोजगार व्यवसायी संघका महासचिव हिराबहादुर डाँगी भन्छन्, ‘सरकारी प्रणालीमार्फत श्रमिक लैजाँदा निजी क्षेत्रसँग पनि सहकार्य गर्न आवश्यक छ। नयाँ श्रम गन्तव्यका रूपमा मौरिससमा नेपाली श्रमिक पठाउन सरकारले प्रक्रिया अगाडि बढाएको विषयलाई सकारात्मक नै मान्नुपर्छ। तर, करोडौँ लगानी गरेर स्थापना भएका वैदेशिक रोजगार व्यवसायीसँग पनि त सहकार्य गर्न आवश्यक छ।’
नेपाल सरकारको जिटुजी माध्यमबाट श्रमिक पठाउने नीतिमा निजी क्षेत्रको भूमिका, सहभागिता तथा सहकार्यको स्पष्ट व्यवस्था हुनुपर्ने उनको भनाइ छ। सोमबार व्यवसायीहरूले श्रममन्त्री रामजी यादवलाई भेटी वैदेशिक रोजगार व्यवसायमा देखिएका चुनौतीहरू समाधान गर्न ध्यानाकर्षण गराए। भेटका क्रममा उनीहरूले वैदेशिक रोजगार सूचना व्यवस्थापन प्रणालीमा देखिएका प्राविधिक तथा व्यावहारिक समस्याहरूको तत्काल समाधान गर्न आग्रह गरे।
यस्तै, साउदी अरेबियाको श्रमिक छनोट तथा सीप परीक्षणसम्बन्धी प्रक्रियामा देखिएका व्यावहारिक समस्याहरूको समाधान गर्न तथा नेपाली श्रमिक र व्यवसायीलाई अनावश्यक आर्थिक र प्रशासनिक भार नपर्ने गरी सहजीकरण गर्न व्यवसायीहरूले माग गरे।
त्यसैगरी, ‘ए’ सिरियल नम्बर भएका नेपाली राहदानीहरू गन्तव्य मुलुकको अध्यागमन प्रणालीमा अनलाइन नहुँदा भिसा प्रक्रियामा देखिएको समस्या समाधानका लागि सम्बन्धित निकाय तथा गन्तव्य मुलुकसँग आवश्यक कूटनीतिक र प्राविधिक पहल गरिनुपर्ने माग उनीहरूको छ।
नेपाली श्रमिकका लागि सुरक्षित, मर्यादित र रोजगारदाताले लागत व्यहोर्ने सिद्धान्तबाट वैदेशिक रोजगारीका अवसर विस्तार गर्ने उद्देश्यले नेपाल र मौरिससबीच सरकार–सरकार (जिटूजी) प्रणालीमार्फत श्रमिक भर्ती गर्ने प्रक्रिया अघि बढेको छ। नेपालको प्रस्तावलाई सकारात्मक रूपमा लिँदै मौरिससले जिटुजी प्रणालीअन्तर्गतको प्रक्रियामा सहमत रहेको जानकारी दिएको छ।
