तपाईं कुकुरलाई माया गर्नुहुन्छ ? कुकुरको भावना बुझ्नुहुन्छ ? कुकुरको बारेमा जानकारी राख्नुहुन्छ ? त्यसो हो भने तपाईंका लागि एउटा अवसर छ- कुकुर तिहारको बारेमा राम्रो रील बनाउने ।

तपाईंले बनाएको रील सर्वोत्कृष्ट ठहरिएमा एक लाख रुपैयाँ पुरस्कार प्राप्त गर्न सक्नुहुनेछ ।




यसरी कुकुरको सर्वोत्कृष्ट रीललाई सरकारले पुरस्कृत गर्न लागेको हो । किनकि नेपाल पर्यटन बोर्डले पहिलो पटक ‘कुकुर तिहार रील प्रतियोगिता–२०८२’ आयोजना गर्दैछ । संस्कृति, पर्यटन तथा नागरिक उड्डयन मन्त्रालयले यो अवधारणा अनुरुप यो प्रतियोगिताको मेलोमेसो मिलाएको हो ।

‘यस कुकुर तिहारमा हाम्रा अबोध साथीहरूको निःस्वार्थ प्रेम, वफादारी र साथको उत्सव मनाऔँ’ भन्दै प्रतियोगिताका लागि आह्वान गरिएको छ । यसका लागि कुकुर तिहारमा यी प्यारा साथीसँगका रमाइला पलहरूको कथावाचनसहित भिडियो बनाउनुपर्नेछ ।


नेपालको मौलिक कला, संस्कृति, परम्परालाई अन्तर्राष्ट्रिय स्तरमा ब्रान्डिङ गर्ने श्रृंखलाअन्तर्गत यस्तो प्रतियोगिता आयोजना गर्न लागिएको हो । कुकुरलाई विशेष पूजाआजा गर्ने यो नेपालको मौलिक र पृथक प्रचलन हो ।

विशेष गरी कुकुर तिहारको महत्व, मान्छे र कुकुरबीचको घनिष्ठतालाई डिजिटल सामग्रीको माध्यमबाट विश्वभर चिनाउने उद्देश्य राखिएको छ ।

कसरी सहभागी हुने ?
यदि तपाईं इच्छुक हुनुहुन्छ भने तपाईंले कुकुर तिहारसँग सम्बन्धित भिडियो बनाउनुपर्नेछ । यो भिडियो तपाईंको मौलिक हुनुपर्नेछ । साथसाथै रचनात्मक पनि । सो भिडियो रील तयार गरी आफ्नो फेसबुक वा इन्स्टाग्राममा पोस्ट गर्नुपर्नेछ । पोस्टसँगै अंग्रेजीमा #NepalTourism, #KukurTihar लेखेर ह्यास्ट्याग गर्नुपर्नेछ ।

यदि इन्स्टाग्राममा पोस्ट गर्नुभएको छ भने @nepaltourism लाई ट्याग गर्नुपर्नेछ । फेसबुकमा हो भने नेपाल पर्यटन बोर्डको आधिकारिक पेसमा ट्याग गर्नुपर्नेछ ।

अंग्रेजी भाषाको प्रयोग
प्रतियोगिताका लागि तयार पारिएको रील अंग्रेजी भाषामा हुनुपर्ने बताइएको छ । यसमा अंग्रेजी सबटाइटल वा अंग्रेजी भाषाको भ्वाइसओभर अनिवार्य गरिएको छ ।

कहाँ पठाउने ?
तयार गरी सामाजिक सञ्जालमा पोस्ट गरेको भिडियोको गुगल ड्राइभ लिंक photonepa@ntb.org.np मा इमेल पठाउनुपर्नेछ । यसरी पठाउँदा डाउनलोड गर्न र हेर्न मिल्ने अनुमति प्रदान गरिदिनुपर्नेछ ।

कहिलेसम्म पठाउने ?
सन २०२६ नोभेम्बर २१ सम्ममा सहभागी हुन चाहनेले भिडियो पठाउनुपर्नेछ ।