: अमेरिकी राष्ट्रपति डोनाल्ड ट्रम्पको कार्यकालको अन्तिम दुई वर्षअघि हुने मध्यावधि निर्वाचनका लागि अमेरिकाभर मतदान भइरहेको छ । यस निर्वाचनलाई ट्रम्प र उनको रिपब्लिकन पार्टीका लागि महत्वपूर्ण राजनीतिक परीक्षाका रूपमा हेरिएको छ ।
निर्वाचनमा सिनेट र प्रतिनिधिसभाका विभिन्न सिटका लागि प्रतिस्पर्धा भइरहेको छ । सिनेटका ६ सिटमा कडा प्रतिस्पर्धा हुने अनुमान गरिएको छ। तीमध्ये अलास्का, कन्सास, आयोवा, मेन, ओहायो र टेक्सास रहेका छन् । यी सबै सिट हाल रिपब्लिकन पार्टीको नियन्त्रणमा छन् ।
प्रतिनिधिसभामा पनि रिपब्लिकन पार्टीको बहुमत निकै साँघुरो छ । त्यसैले निर्वाचनको नतिजाले अमेरिकी संसद्का दुवै सदनमा शक्ति सन्तुलन परिवर्तन गर्न सक्ने देखिएको छ ।
यसैबीच, जर्जिया राज्यमा डेमोक्रेटिक उम्मेदवार केइशा लान्स बटम्स निर्वाचित भए अमेरिकी इतिहासमै गभर्नर बन्ने पहिलो अश्वेत महिला बन्नेछिन् । उनी रिपब्लिकन उम्मेदवार रिक ज्याक्सनसँग कडा प्रतिस्पर्धामा छिन् ।
निर्वाचनमा मतदाताहरूले कर, महँगी, जीवनयापनको खर्च, सार्वजनिक सुरक्षा र अल्पसंख्यक अधिकारलाई प्रमुख चासोका विषय बनाएका छन् । निर्वाचनको परिणामले ट्रम्प प्रशासनको बाँकी कार्यकाल र अमेरिकी राजनीतिमा आगामी शक्ति सन्तुलन निर्धारण गर्ने अपेक्षा गरिएको छ ।
