: नक्कली भुटानी शरणार्थी प्रकरणमा दोषी ठहर भई कारागारमा रहेका पूर्वउपप्रधानमन्त्री टोपबहादुर रायमाझी आगामी कात्तिक २६ गते रिहा हुने भएका छन् ।
काठमाडौं जिल्ला अदालतले रायमाझीलाई कैदमुक्त गर्न कारागार कार्यालय डिल्लीबजारलाई पत्राचार गरेको छ । अदालतको तहसिल लगत शाखाले कात्तिक १३ गते आदेश जारी गर्दै उनलाई रिहा गर्न निर्देशन दिएको हो ।
नक्कली भुटानी शरणार्थी प्रकरणमा ठगी, लिखत किर्ते, राज्यविरुद्धको अपराध र संगठित अपराधसम्बन्धी कसुरमा मुद्दा चलाइएका रायमाझी २०८० वैशाख २० गते पक्राउ परेका थिए । त्यसयता उनी डिल्लीबजार कारागारमा थुनामा थिए ।
काठमाडौं जिल्ला अदालतले २०८३ असार ३० गते सजाय निर्धारण गर्दै उनलाई चार वर्ष कैद, ४० हजार रुपैयाँ जरिवाना र पीडित राहत कोषमा १ हजार ६ सय रुपैयाँ दाखिला गर्नुपर्ने फैसला गरेको थियो ।
तर, ६५ वर्ष उमेर पूरा हुन लागेकाले उनले ज्येष्ठ नागरिकसम्बन्धी कानुनी व्यवस्थाअनुसार कैद सजायमा २५ प्रतिशत छुट पाएका छन् । चार वर्षको कैद सजायमध्ये एक वर्ष छुट भएपछि उनले तीन वर्ष मात्रै कैद भुक्तान गर्नुपर्ने भएको हो ।
रायमाझीले २०८० वैशाख २० गतेदेखि नै थुनामा बसेको अवधि गणना गर्दा तीन वर्षको कैद सजाय २०८३ वैशाख १९ गते नै पूरा गरिसकेका छन् । जरिवाना नतिरेबापत हुन सक्ने थप चार महिना १४ दिनको कैदसमेत उनले थुनामा बसेको अतिरिक्त अवधिबाट कट्टा गरिएको अदालतले जनाएको छ ।
अदालतका अनुसार कैद र जरिवानाबापतको सजाय भुक्तान भइसकेको छ । तर, रिहा हुनुअघि उनले फैसलाबमोजिमको १ हजार ६ सय रुपैयाँ क्षतिपूर्ति दाखिला गर्नुपर्नेछ ।
उक्त रकम दाखिला गरेपछि अन्य कुनै मुद्दा वा कारणले थुनामा राख्नुपर्ने अवस्था नरहेमा उनलाई कात्तिक २६ गते कैदमुक्त गर्न अदालतले कारागारलाई निर्देशन दिएको छ ।
