: युक्रेनको दक्षिणी जापोरिजिया क्षेत्रमा रुसी हवाई आक्रमणमा परी कम्तीमा २४ जनाको मृत्यु भएको छ । आक्रमणमा पाँच जना घाइते भएका छन् भने केही व्यक्ति भग्नावशेषमा पुरिएको आशंका गरिएको छ ।
क्षेत्रीय प्रमुख मिखाइलो सेमिकिनका अनुसार सोमबार कोमिशुभाखा गाउँस्थित मानवीय सहायता वितरण केन्द्रमा कम्तीमा नौवटा तीन हजार किलोग्रामका हवाई बम प्रहार गरिएको थियो ।
युक्रेनी राष्ट्रपति भोलोदिमिर जेलेन्स्कीले स्थानीय विद्यालयमा पहिलो आक्रमण भएपछि मानिसहरू आश्रय लिएर बसेको स्थानमा दोस्रो आक्रमण गरिएको बताएका छन् ।
युक्रेनको आपत्कालीन सेवा (DSNS) का अनुसार मृत्यु हुनेमा दुई जना उद्धारकर्मी र चार जना प्रहरी अधिकारीसमेत छन् । आक्रमणपछि उद्धार टोलीले भग्नावशेषमा पुरिएकाहरूको खोजी गरिरहेको छ ।
तर, क्षेत्रमा रुसी ड्रोन आक्रमणको जोखिम कायम रहेकाले उद्धार कार्य पटकपटक रोक्नुपरेको अधिकारीहरूले बताएका छन् ।
राष्ट्रपति जेलेन्स्कीले मानवीय सहायता लिन आएका सर्वसाधारणलाई लक्षित गरी गरिएको आक्रमणलाई अत्यन्त भयावह भन्दै रुसले तनाव कम गर्ने इच्छा नदेखाएको आरोप लगाएका छन् ।
सन् २०२२ फेब्रुअरीदेखि रुसले युक्रेनमाथि पूर्णस्तरको आक्रमण सुरु गरेको थियो ।
