: जिल्ला प्रशासन कार्यालय भक्तपुरले बाहिरी जिल्लाको पहिलो नागरिकता प्रतिलिपी जारी गरेको छ। नागरिकताको प्रतिलिपी लिन आएका ओखलढुंगाका सेवाग्राही कपिल भट्टराईलाई सोमबार प्रमुख जिल्ला अधिकारी बिनोदकुमार खड्काले प्रतिलिपी हस्तान्तरण गरेका छन्।
नेपाल नागरिकता (पाचौं संशोधन) नियमावली २०८३ को नियम १६(घ) बमोजिम अन्य जिल्लाबाट समेत नागरिकता प्रतिलिपी लिने ब्यवस्था भएको र गृह मन्त्रालयको २०८३ कात्तिक ९ गतेको परिपत्र अनुसार प्रतिलिपी जारी गरिएको प्रमुख जिल्ला अधिकारी खड्काले बताए। बाहिरी जिल्ला अन्तर्गत कोशी र मधेश प्रदेशबाट जारी भएका नागरिकताको प्रतिलिपी लिन आएमा जिल्ला प्रशासन कार्यालय भक्तपुरबाट दिने ब्यवस्था गरिएको उनले बताएका छन्।
सहायक प्रमुख जिल्ला अधिकारी लक्ष्मीदेवी शर्माका अनुसार नागरिकताको प्रतिलिपीका लागि वडा र सम्बन्धित जिल्लाको सिफारिस समेत चाहिँदैन। सम्बन्धीत व्यक्तिले प्रतिलिपी पाऊँ भनेर निवेदन दिएपछि एकैदिनमा प्रतिलिपी दिइने उनले बताइन्। पुरानो नागरिकताको फोटोकपी र राष्ट्रिय परिचय पत्रको फोटोकपी भएपछि प्रक्रिया शुरु हुने र गृह मन्त्रालयले उपलब्ध गराएको डिभाइसमा बायोमेट्रिक गरेपछि (औंला राखेपछि) उपलब्ध हुने निवेदकको सम्पूर्ण विवरण प्रमाणीकरणका आधारमा प्रतिलिपी उपलब्ध गराइने उनले बताइन्।
सेन्ट्रल सिटिजनशिप इन्फर्मेसन म्यानेजमेन्ट सिस्टम र एनआइडीएमएसमा विवरण फरक परे प्रतिलिपी जारी नहुने जिल्ला प्रशासन कार्यालय भक्तपुरले स्पष्ट पारेको छ। बाहिरी जिल्लाबाट जारी नागरिकताको प्रतिलिपी लिन राष्ट्रिय परिचय पत्र अनिवार्य हुनुपर्ने बताइएको छ।
