: नेपाल भ्रमणमा रहेका स्विट्जरल्याण्ड नेशनल काउन्सिलका अध्यक्ष पिएरे आन्द्रे पाजले राष्ट्रिय सभाका अध्यक्ष नारायणप्रसाद दाहालसँग शिष्टाचार भेटवार्ता गरेका छन्।
सोमबार सिंहदरबारमा भएको भेटवार्तामा दुई देशबीचको आपसी हितका विषयमा छलफल भएको थियो। भेटवार्ताका क्रममा राष्ट्रिय सभा अध्यक्ष दाहालले स्विट्जरल्याण्डले नेपाललाई विकास साझेदारका रूपमा विभिन्न विपद् तथा विकास निर्माणका कार्यहरूमा गर्दै आएको सहयोगका लागि धन्यवाद व्यक्त गरे। साथै, आगामी दिनहरूमा पनि यो सहयोग निरन्तर रहने विश्वास व्यक्त गरिएको जानकारी अध्यक्ष दाहालले दिए। नेपाल र स्विट्जरल्याण्डबीच कूटनीतिक सम्बन्ध स्थापना भएको ७०औँ वर्षगाँठ चलिरहेको सन्दर्भमा दुवै पक्षले एक-अर्कालाई शुभकामना आदानप्रदान गरेका थिए।
त्यसैगरी, स्विट्जरल्याण्डमा रहेका ठूला तथा विश्वस्तरीय औषधि उत्पादक कम्पनीहरूमार्फत नेपालमा पनि सरकारी स्तरमा उद्योग स्थापना गर्न सकिएमा नेपाली जनतालाई धेरै सहुलियत पुग्ने धारणा आफूले राखेको अध्यक्ष दाहालले बताए।
स्विट्जरल्याण्ड नेशनल काउन्सिलका अध्यक्ष पाजले नेपालको आवश्यकता अनुसार सहयोगका लागि पहल गर्ने प्रतिबद्धता व्यक्त गरे। साथै, दुई देशका संसद्बीच अभ्यास तथा अनुभव आदानप्रदान गर्न र सम्बन्धलाई अझ सुदृढ बनाउन संसदीय मैत्री समूह गठन गरी सहकार्य गर्ने विषयमा छलफल भएको जानकारी अध्यक्ष दाहालले दिए।
अध्यक्ष पाज ६ सदस्यीय प्रतिनिधिमण्डलको नेतृत्व गर्दै सोमबार नै काठमाडौँ आइपुगेका हुन्।
