: विश्वकै सबैभन्दा ठूलो क्रिप्टोकरेन्सी एक्सचेन्ज बाइनान्समा भएको ठूलो साइबर आक्रमणमा ६ अर्ब ३० करोड अमेरिकी डलर बराबरको डिजिटल सम्पत्ति चोरी भएको छ । बाइनान्सले चोरी भएको रकममध्ये करिब ३ अर्ब डलर सुरक्षित गर्न सफल भएको जनाएको छ ।
कम्पनीका अनुसार बाँकी रकम अझै अज्ञात ह्याकरहरूको नियन्त्रणमा रहेको छ । सुरुमा एक इन्जिनियरको ल्यापटप ह्याक गरी अनधिकृत रूपमा रकम निकालिएको आशंका गरिएको बिबिसिले जनाएको छ । तर, पछिल्लो अनुसन्धानले आक्रमण एकभन्दा बढी सुरक्षा कमजोरीमार्फत भएको देखाएको छ ।
विभिन्न क्रिप्टो विश्लेषण गर्ने संस्थाहरूले उक्त साइबर आक्रमण उत्तर कोरियासँग सम्बन्धित ह्याकर समूहले गरेको हुन सक्ने बताएका छन् । यसअघि सन् २०२५ मा बाइबिट एक्सचेन्जबाट १ अर्ब ५० करोड डलर चोरी भएको घटनालाई समेत उछिन्दै यो क्रिप्टो क्षेत्रकै ठूलो चोरीका रूपमा देखिएको छ ।
अमेरिकी गोप्य सेवा (यूएस सिक्रेट सर्भिस) ले चोरी भएको रकम पहिचान, रोक्का, ट्र्याक र फिर्ता ल्याउन निरन्तर काम भइरहेको जनाएको छ । साथै, आक्रमणमा संलग्न साइबर अपराधी पहिचान गरी कानुनी दायरामा ल्याउने प्रतिबद्धता व्यक्त गरेको छ । बाइनान्सले पनि अमेरिकी संघीय अनुसन्धान ब्युरो (एफबीआई) सँग सहकार्य गरिरहेको जनाएको छ ।
बाइनान्सका सहप्रमुख कार्यकारी अधिकृत रिचर्ड टेङले प्रारम्भिक अनुसन्धानमा इन्जिनियरको ल्यापटपमा सुरक्षा कमजोरी देखिए पनि थप अनुसन्धान गर्दा आक्रमणका अन्य माध्यमसमेत फेला परेको बताएका छन् । उनका अनुसार ह्याकरहरूले आफ्नो गतिविधिको डिजिटल प्रमाण मेटाउने प्रविधिसमेत प्रयोग गरेका थिए ।
कम्पनीले अमेरिकी प्रयोगकर्ताका लागि सञ्चालनमा रहेको एक्सचेन्जमा भने आक्रमणको असर नपरेको स्पष्ट पारेको छ । सुरुमा सबै निक्षेप तथा रकम झिक्ने सेवा स्थगित गरेको बाइनान्सले पछि निक्षेप सेवा प्रभावित नभएको जनाएको थियो ।
बाइनान्सले आफ्ना प्रयोगकर्तालाई रकम सुरक्षित रहेको र चोरीबाट भएको सम्पूर्ण क्षति कम्पनीले बेहोर्ने आश्वासन दिएको छ । यद्यपि, ठूलो आर्थिक क्षति बेहोर्न कम्पनी सक्षम छ कि छैन भन्ने विषयमा क्रिप्टो बजारमा चिन्ता व्यक्त भइरहेको छ ।
केही वित्तीय तथा कानुनी विज्ञहरूले कम्पनीको आश्वासनलाई मात्र आधार मानेर ढुक्क नहुन प्रयोगकर्तालाई सुझाव दिएका छन् । ग्राहकको रकम फिर्ता पाउने विषय कम्पनीसँग भएको सम्झौता तथा कानुनी व्यवस्थामा निर्भर रहने उनीहरूको भनाइ छ ।
क्रिप्टो विश्लेषण कम्पनी चेनालाइसिसले उक्त आक्रमणमा उत्तर कोरियासँग सम्बन्धित व्यक्तिको संलग्नता रहेकोमा उच्च विश्वास रहेको जनाएको छ । पछिल्ला पाँच वर्षमा क्रिप्टोकरेन्सी क्षेत्रमा भएका ठूला चोरीका घटनामा उत्तर कोरियाली ह्याकर समूहको संलग्नता देखिँदै आएको विभिन्न अनुसन्धानले औँल्याएका छन् ।
उत्तर कोरियामाथि अन्तर्राष्ट्रिय प्रतिबन्ध र कमजोर अर्थतन्त्रका कारण साइबर अपराधमार्फत रकम जुटाउने गरेको आरोप लाग्दै आएको छ । तर उत्तर कोरियाले भने यस्ता आरोप अस्वीकार गर्दै आएको छ ।
