: नेपालले कोप–३१ मा पर्वतलाई छुट्टै एजेन्डाका रूपमा अघि सार्दै औपचारिक प्रस्तुति गर्ने भएको छ।
बिहीबार काठमाडौंमा आयोजित राष्ट्रिय जलवायु सम्मेलनमा कृषि, वन तथा वातावरणमन्त्री गीता चौधरीले कोप–३१ मा नेपाल र भुटानले संयुक्त रूपमा पर्वतलाई छुट्टै एजेन्डाका रूपमा अघि सार्दै औपचारिक प्रस्तुति गर्ने जानकारी दिइन्। यसले जलवायु न्यायको लडाइँमा पर्वतीय क्षेत्रको आवाजलाई अझ बलियो बनाउने उनको भनाइ छ। मन्त्री चौधरीले हिमाल जोगाउनु भनेको तल्लो तटीय क्षेत्रका अर्बौँ मानिसको जीवन जोगाउनु भएको उल्लेख गरिन्।
उनले नेपालले कोप–३१ का लागि समावेशी एवम् सबै सरोकारवालाहरूलाई समेटेर 'कन्ट्री पोजिसन पेपर' तयार पारेको र भोटेकोशीलगायत जलवायु परिवर्तनका असर, सफलता र असफलताका अनुभवहरू प्रदर्शन गर्न नेपालले आफ्नै पेभेलियन राख्ने जानकारी पनि दिइन्।
जलवायु परिवर्तन कुनै एक मन्त्रालय वा एक तहको मात्र विषय नभएको उल्लेख गर्दै उनले सङ्घ, प्रदेश र स्थानीय तह मिलेर काम गर्नुपर्नेमा जोड दिइन्। जलवायु अनुकूलन सिंहदरबारबाट मात्र नभई वडा र समुदायस्तरबाट सुरु हुनुपर्ने मन्त्री चौधरीको टिप्पणी छ।
कोपमा नेपालको अडान जलवायु न्याय, पर्वतीय एजेन्डा, अनुकूलन, वित्तमा सहज पहुँच र हानि–नोक्सानी कोषको प्रभावकारी परिचालनमा स्पष्ट रहेको उनले बताइन्। ऐतिहासिक रूपमा बढी उत्सर्जन गर्ने र क्षमता भएका राष्ट्रहरूले क्षमताअनुसारको जिम्मेवारी लिनुपर्नेमा उनले जोड दिइन्।
