: त्रिभुवन अन्तर्राष्ट्रिय विमानस्थलस्थित कार्गो कम्प्लेक्सबाट अवैध रूपमा विदेश पठाउन लागिएको एक हजार प्याकेट चुरोट बरामद गरिएको छ।
त्रिभुवन अन्तर्राष्ट्रिय विमानस्थल सुरक्षा कार्यालयका अनुसार २०८३ कात्तिक १० गते राति करिब ११ः३० बजे विमानस्थलको अन्तर्राष्ट्रिय उडानतर्फको कार्गो कम्प्लेक्स भवनको ‘ए’ साइडमा रहेको एक्स-रे मेसिनबाट सामान स्क्यान गर्ने क्रममा शङ्कास्पद कार्टुन फेला परेको थियो ।
स्क्यानिङका क्रममा आवश्यक कागजात पूरा नगरी विदेश पठाउन लागिएको ‘सूर्या लक्जरी किङ’ ब्रान्डको १०० बन्डल अर्थात् एक हजार प्याकेट चुरोट फेला परेको प्रहरीले जनाएको छ ।
प्रहरीका अनुसार उक्त चुरोट स्काइकिङ लजिस्टिक प्रालिमार्फत विदेश पठाउन लागिएको थियो। बरामद चुरोट आवश्यक कानुनी प्रक्रिया तथा थप अनुसन्धान र कारबाहीका लागि कात्तिक १० गते त्रिभुवन विमानस्थल भन्सार कार्यालय, गौचरमा बुझाइएको छ ।
घटनाबारे थप अनुसन्धान भइरहेको प्रहरीले जनाएको छ ।
