: इजरायली सेनाले कब्जा गरिएको पश्चिम किनारको हेब्रोन सहरमा घर, व्यवसाय तथा अन्य संरचना भत्काएपछि सयौँ परिवार विस्थापित भएका छन् । स्थानीय अधिकारीहरूका अनुसार सैन्य कारबाहीका कारण एक हजारभन्दा बढी मानिस घर छाड्न बाध्य भएका छन् ।
इजरायली सेनाले हेब्रोनका ऐन देर बहा र फार्श अल–हावा क्षेत्रमा केन्द्रित रहेर घर, व्यावसायिक भवन, औद्योगिक स्थल तथा पूर्वाधारमा तोडफोड गरेको हो । सार्वजनिक भएका दृश्यमा बुल्डोजरले भवनहरू भत्काएको र कम्तीमा एउटा सडक आसपासका संरचना पूर्ण रूपमा ध्वस्त भएको देखिन्छ ।
स्थानीय अधिकारीहरूका अनुसार सेनाले सहरका विभिन्न भागमा आवतजावतमा कडा प्रतिबन्ध लगाएको छ । करिब दुई लाख जनसङ्ख्या रहेको हेब्रोनमा सर्वसाधारणको आवागमन प्रभावित भएको छ ।
हेब्रोनका मेयर युसुफ अल-जाबारीले सैन्य कारबाहीका कारण एक हजारभन्दा बढी मानिस विस्थापित भएको बताएका छन् । उनका अनुसार दर्जनौँ परिवारले रात बाहिरै बिताउनुपरेको छ । केही परिवारलाई आफ्ना सवारीसाधनसमेत नलिई घर छाड्न भनिएको र भत्काइने घरमा स्प्रे पेन्टले चिह्न लगाइएको उनले बताए ।
मेयर अल–जाबारीले करिब ०।३५ वर्ग किलोमिटर क्षेत्रबाट लगभग दुई हजार पाँच सय मानिसलाई विस्थापित गर्ने योजना रहेको आशङ्का व्यक्त गरेका छन् । सहरका गभर्नर र उपमेयरले भने कम्तीमा दुई सय परिवार विस्थापित भएको बताएका छन् ।
इजरायली प्रधानमन्त्री बेन्जामिन नेतान्याहुले शुक्रबार दुई इजरायली सैनिकको ज्यान जाने गरी भएको आक्रमणपछि उक्त कारबाही घोषणा गरेका थिए । चेकपोइन्टमा दुई प्यालेस्टिनी बन्दुकधारीले गरेको आक्रमणमा तीन अन्य इजरायली सैनिक घाइते भएका थिए । आक्रमणमा संलग्न दुवै बन्दुकधारी पनि मारिएका थिए ।
नेतान्याहुले आक्रमण भएको स्थान वरपरका भवन र आक्रमणकारीका बस्तीमा रहेका संरचना भत्काइने बताएका थिए । उनले हेब्रोन पुगेर बस्तीहरूमा घर–घरमा खोजी गर्ने, हतियार बरामद गर्ने तथा आफूहरूले आतङ्कवादी पूर्वाधार मानेका संरचना नष्ट गर्ने बताएका थिए ।
इजरायली सेनाले सामाजिक सञ्जालमार्फत पश्चिम किनारका विभिन्न स्थानमा दर्जनौँ लक्ष्यमा कारबाही भइरहेको र यो अभियान केही दिनसम्म जारी रहने जनाएको छ । बीबीसीले प्रतिक्रियाका लागि गरेको अनुरोधमा सेनाले तत्काल जवाफ नदिएको समाचारमा उल्लेख छ ।
प्यालेस्टिनी प्राधिकरणले विस्थापन रोक्न निन्दामा मात्र सीमित नभई तत्काल अन्तर्राष्ट्रिय कदम चाल्न आग्रह गरेको छ । प्राधिकरणले जबर्जस्ती विस्थापन रोक्न अन्तर्राष्ट्रिय समुदायसँग अपिल गरेको हो ।
प्यालेस्टिनीमाथि आक्रमणको आरोप लागेका व्यक्तिका घर भत्काउने इजरायलको अभ्यासलाई मानवअधिकार समूहहरूले सामूहिक सजायका रूपमा आलोचना गर्दै आएका छन् ।
यसैबीच, इजरायलका दक्षिणपन्थी अर्थमन्त्री बेजालेल स्मोट्रिचले पश्चिम किनारमा गाजा वा लेबनानमा जस्तै सैन्य अभियान चलाउनुपर्ने बताएका छन् । राष्ट्रिय सुरक्षा मन्त्री इतामार बेन–गभिरले प्यालेस्टिनी प्राधिकरण विघटन गर्नुपर्ने धारणा राखेका छन् ।
हेब्रोनका मेयरले भने आगामी निर्वाचनलाई लक्षित गर्दै प्रधानमन्त्री नेतान्याहु र उनका मन्त्रीहरूले दक्षिणपन्थी तथा यहुदी बस्तीका समर्थक मतदातालाई आकर्षित गर्न यस्तो कारबाही गरेको आरोप लगाएका छन् ।
