: ललितपुरको कुसुन्तीमा लिफ्टसहितको आकाशे पुल निर्माण कार्य अन्तिम चरणमा पुगेको छ।
कुनै अवरोध नआए निर्माण कार्य एक महिनाभित्र सम्पन्न गर्ने लक्ष्य राखिएको ललितपुर महानगरपालिकाले जनाएको छ। सडक पार गर्ने क्रममा अकस्मात दुर्घटनामा परी १९ जनाले ज्यान गुमाइसकेकाले स्थानीय वडावासी र नगरवासीहरूको विशेष अनुरोधमा कुसुन्तीमा लिफ्टसहितको आकाशे पुल निर्माण गरिएको ललितपुर महानगरपालिकाका प्रमुख चिरिबाबु महर्जनले जानकारी दिए।
पुल पार गर्नका लागि हिँड्न सक्नेहरूका लागि भर्याङको व्यवस्था गरिएको छ भने हिँड्न नसक्ने वा ह्वीलचियर प्रयोग गर्ने अपाङ्गता भएका व्यक्तिहरूका लागि आकाशे पुलको दुवैतिर लिफ्टको व्यवस्था गरिएको छ।
मेयर महर्जनले पुलको अनुमानित लागत करिब ५ करोड २० लाख रुपैयाँको हाराहारीमा रहेको बताए। अपाङ्गमैत्री क्रसिङ पुल निर्माण भएपछि यस क्षेत्रमा हुने सडक दुर्घटनाहरू पूर्ण रूपमा रोकिने महानगरको विश्वास छ।
