: उत्तर कोरियाली नेता किम जोङ उन शनिबार चीन पुगेका छन्। दक्षिण कोरियाली सरकारी अधिकारीका अनुसार किम उत्तर कोरिया र चीनलाई जोड्ने हालै सञ्चालनमा आएको नयाँ यालु नदी पुल हुँदै चिनियाँ सीमावर्ती सहर डान्दोङ पुगेका हुन्।
दक्षिण कोरियाली अधिकारीले किम नयाँ यालु नदी पुल पार गरेर चीन प्रवेश गरेको जानकारी दिएका हुन्। सार्वजनिक रूपमा बोल्ने अधिकार नभएकाले ती अधिकारीले आफ्नो नाम खुलाउन नचाहेको रोयटर्सले जनाएको छ। मामिलाबारे जानकार अर्का दक्षिण कोरियाली अधिकारीका अनुसार चीनका प्रधानमन्त्री ली छ्याङले सीमावर्ती सहर डान्दोङमा किमलाई भेटेका थिए।
किमको यो भ्रमण सन् १९५० देखि १९५३ सम्म चलेको कोरियाली युद्धमा चीन सहभागी भएको वार्षिकोत्सवको एक दिनअघि भएको हो। दक्षिण कोरियाली समाचार संस्था योनहापका अनुसार किम शनिबारकै भ्रमणपछि उत्तर कोरिया फर्किने अपेक्षा गरिएको छ।
चिनियाँ कम्युनिस्ट पार्टीका उच्चस्तरीय बैठक सोमबारदेखि सुरु हुने भएकाले त्यसअघि किम बेइजिङ जाने सम्भावना न्यून रहेको दक्षिण कोरियाली अधिकारीले रोयटर्सलाई बताएका छन्। चीनको विदेश मन्त्रालयले भने यस विषयमा तत्काल कुनै प्रतिक्रिया दिएको छैन।
चीन र उत्तर कोरियाले दुई देशबीचको प्रमुख स्थलसीमा नाका मानिने तीन किलोमिटर लामो नयाँ यालु नदी पुल लामो ढिलाइपछि यसै महिना सञ्चालनमा ल्याएका हुन्। वर्षौँदेखि तनावपूर्ण सम्बन्ध र कोभिड महामारीका कारण प्रभावित व्यापार तथा आर्थिक गतिविधिलाई पुनर्जीवित गर्ने उद्देश्यले पुल सञ्चालनमा ल्याइएको हो।
चीनको सरकारी थिंक ट्याङ्क लियाओनिङ एकेडेमी अफ सोसल साइन्सेसका चीन-उत्तर कोरिया सम्बन्धविज्ञ लु चाओका अनुसार किमको भ्रमण दुई देशबीच आर्थिक सम्बन्ध विस्तार र उच्चस्तरीय भेटघाट बढिरहेको पछिल्लो अवस्थासँग मेल खान्छ।
‘यो पुल सञ्चालनमा आएसँगै चीन र उत्तर कोरियाबीचको व्यापारिक ढुवानीमा रहेको प्रमुख अवरोध हटेको छ,’ लुले भने, ‘ढुवानीसम्बन्धी समस्या कम भएपछि दुई देशबीचको व्यापार थप बढ्ने सम्भावना छ।’
नयाँ पुलबाट उत्तर कोरियालाई विकासका लागि आवश्यक पर्ने ठूला उपकरण, कच्चा पदार्थ र ऊर्जा उत्पादनसम्बन्धी सामग्री ढुवानी गर्न सहज हुने अपेक्षा गरिएको छ। पछिल्लो १३ महिनामा दुई देशका नेताबीच दुईवटा शिखर बैठक भइसकेका छन्। यसले बेइजिङ र प्योङयाङबीच सम्बन्ध सुधार हुँदै गएको संकेत गरेको छ।
