: जर्मनीका चान्सलर फ्रेडरिक मर्जले देशमा रुसी गुप्तचर सेवाको जासुसी गतिविधि तीव्र रहेको बताएका छन् । रुसका लागि जासुसी गरेको आशङ्कामा एक युक्रेनी नागरिक पक्राउ परेपछि उनले यस्तो चेतावनी दिएका हुन् ।
जर्मन अधिकारीहरूका अनुसार वादिम वाई नामले चिनाइएका ती व्यक्तिमाथि जर्मनीको सैन्य क्षेत्रसँग सम्बन्धित गोप्य सूचना सङ्कलन गरेको आरोप छ । उनले सन् २०२५ को जुलाईदेखि नै एक मध्यस्थकर्तामार्फत रुसी गुप्तचर सेवासँग सम्पर्क राख्दै आएको जर्मनीका सङ्घीय अभियोजनकर्ताको कार्यालयले जनाएको छ ।
आरोपीले बख्तरबन्द सवारीसाधन, गोलाबारुद र विस्फोटक पदार्थको उत्पादनसम्बन्धी जानकारी सङ्कलन गरेको आरोप लगाइएको छ । उनलाई शुक्रबार अनुसन्धानसम्बन्धी सुनुवाइका लागि न्यायाधीशसमक्ष उपस्थित गराउने तयारी गरिएको छ ।
मर्जले घटनाको पर्दाफास हुनुलाई सफलताका रूपमा व्याख्या गर्दै रुसी गुप्तचर सेवाको गतिविधि भने उच्च स्तरमै कायम रहेको बताए। आगामी महिना र वर्षमा यस्ता थप घटना सार्वजनिक हुन सक्ने उनको भनाइ छ ।
यस वर्ष जर्मनीमा रुससहित विदेशी शक्तिका लागि जासुसी गरेको आशङ्कामा विभिन्न व्यक्तिहरू पक्राउ परिसकेका छन् । जर्मनीले सन् २०२२ मा रुसले युक्रेनमाथि पूर्णस्तरको आक्रमण सुरु गरेयता युक्रेनलाई हतियार उपलब्ध गराउने प्रमुख युरोपेली मुलुकमध्ये एकका रूपमा भूमिका खेल्दै आएको छ ।
यसैबीच, जर्मनीले बेलायतसँग रक्षा तथा सुरक्षा सहकार्यलाई थप मजबुत बनाउने प्रयास गरिरहेको छ । दुवै देशले हाइब्रिड आक्रमण र शत्रुतापूर्ण गतिविधिको सामना गर्न सहकार्य गर्ने विषयमा छलफल गरेका छन् । जर्मनीले सेप्टेम्बरमा लाइपजिगरहाले विमानस्थलमा विस्फोटक पदार्थ जडित ड्रोन पठाएको आरोपसमेत रुसमाथि लगाएको थियो ।
