: बेलायत सरकारले साउदी अरबको सुरक्षाका लागि रोयल एयर फोर्सका टाइफून लडाकु विमानहरू तैनाथ गर्ने निर्णय गरेको छ। यमनको हुथी समूहका तर्फबाट भइरहेका क्षेप्यास्त्र तथा ड्रोन आक्रमणहरूको प्रतिकार गर्न साउदी अरबको रक्षाका लागि बेलायतले यो कदम चालेको बीबीसीले उल्लेख गरेकाे छ।
प्रधानमन्त्री एन्डी बर्नहामद्वारा स्वीकृत यो रक्षात्मक मिसनले इरान समर्थित समूहका हवाई आक्रमणहरूबाट साउदी सहरहरू र पूर्वाधारहरूको सुरक्षा गर्न मद्दत पुर्याउनेछ। साउदीको राजधानी रियादका साथै तटीय क्षेत्रमा रहेका ऊर्जा केन्द्रहरूलाई लक्षित गरी हुथीहरूले आक्रमण तीव्र पारेपछि बेलायतले यो निर्णय लिएको हो।
बेलायती रक्षा मन्त्री वेस स्ट्रिटिङले एक लिखित वक्तव्य जारी गर्दै भनेका छन्, 'यी विमानहरूले पूर्ण रूपमा रक्षात्मक भूमिका निर्वाह गर्नेछन् र हुथीहरूविरुद्ध कुनै पनि आक्रामक हमला गर्ने छैनन्।'
हुथीहरू यमनको अन्तर्राष्ट्रिय रूपमा मान्यता प्राप्त सरकारविरुद्ध गृहयुद्धमा छन्, जसलाई साउदी अरबको समर्थन रहँदै आएको छ। सन् २०१४ मा हुथीहरूले उक्त सरकारलाई राजधानी सानाबाट विस्थापित गरेका थिए।
सेप्टेम्बरदेखि यमनमा युद्धविराम भङ्ग भएपछि साउदी अरबलाई आफ्नो हवाई क्षेत्रको रक्षा गर्न कठिन भइरहेको छ। हुथीहरूले यमनी सरकारविरुद्ध नयाँ रणनीतिक आक्रमण सुरु गर्नुका साथै महत्त्वपूर्ण बाब अल-मन्देब जलडमरूमध्यमाथि प्रभावकारी नियन्त्रण कायम गरेका छन्। साउदी समर्थित सरकारी बलहरूले जवाफी कारबाही सुरु गरेपछि हुथीहरूले साउदी भूभागको गहिराइसम्म पुगेर प्रहार गरिरहेका छन्।
हुथीहरूले किङ खालिद विमानस्थल, ऊर्जा सुविधाहरू र मुख्य बन्दरगाहहरूसहित साउदीका महत्त्वपूर्ण पूर्वाधारहरूमा क्षति पुर्याएका छन्। साउदी अधिकारीहरूका अनुसार गत हप्ता राज्यका विमानस्थलहरूमा भएका हुथी आक्रमणहरूमा १९ जनाको मृत्यु भएको थियो। अक्टोबर १० मा रियादको अन्तर्राष्ट्रिय विमानस्थलमा भएको क्षेप्यास्त्र प्रहारमा १३ जनाको मृत्यु हुनुका साथै ३०८ जना घाइते भएका थिए, जुन एक दशकभन्दा बढी समयमा साउदी अरबमा भएको सबैभन्दा घातक आक्रमण मानिएको छ।
हुथीहरूले पश्चिमी यमनमा उनीहरूको नियन्त्रणमा रहेका क्षेत्रहरू (राजधानी सानासहित) मा भएका साउदी आक्रमणको बदला लिइरहेको बताएका छन्। यसै हप्ताको सुरुमा यमनको मध्य प्रान्त शबवास्थित एक सैन्य क्याम्पमा हुथी क्षेप्यास्त्र प्रहार हुँदा ७० भन्दा बढी सुरक्षाकर्मीको मृत्यु भएको थियो। साउदी समर्थित यमनी सशस्त्र बलका प्रवक्ताका अनुसार अताक सहर नजिकैको अल-आलम क्याम्पमा तीनवटा ब्यालिस्टिक क्षेप्यास्त्र प्रहार गरिएको थियो।
उत्तर-पश्चिमी यमनमा हुथीद्वारा सञ्चालित स्वास्थ्य मन्त्रालयका अनुसार सेप्टेम्बर ३ यता भएका साउदी हवाई र तोपखाना आक्रमणमा कम्तीमा १४१ जनाको मृत्यु हुनुका साथै ३९५ जना घाइते भएका छन्। अर्कोतर्फ, यमन सरकारको स्वास्थ्य मन्त्रालयले गत अगस्ट ६ देखि देशभर भएका द्वन्द्वमा कम्तीमा १,२८२ जनाको ज्यान गएको जनाएको छ।
यस वर्षको सुरुमा इरानी आक्रमणहरूविरुद्ध आफ्ना धेरै हवाई रक्षा प्रणालीहरू प्रयोग भइसकेकाले साउदी अरबलाई आउँदै गरेका क्षेप्यास्त्र र ड्रोनहरू खसाल्न चुनौतीपूर्ण बनिरहेको छ। साथै, देशको विशाल भूभागका कारण पनि सर्वव्यापी हवाई सुरक्षा प्रदान गर्न कठिनाइ भइरहेको छ।
बेलायती युद्धक विमानहरूले साउदी अरबलाई आफ्नो आकाशको रक्षा गर्न मद्दत पुर्याउनेछन्, जसले गर्दा साउदीका आफ्नै विमानहरूलाई हुथीहरूविरुद्ध आक्रामक कारबाही चलाउन सहज हुनेछ। बेलायतले साउदी अरबभित्र रक्षा उपकरणहरूको ओसारपसारमा सहयोग गर्न सैन्य सल्लाहकारहरू र यातायात विमान पनि खटाउने भएको छ। यसका साथै, साउदीको रक्षात्मक अभियानका लागि हावामै इन्धन भर्ने सुविधा पहिलेदेखि नै प्रदान गर्दै आएको बेलायतले उक्त सेवा थप ९० दिनका लागि विस्तार गरेको छ।
रक्षा मन्त्री स्ट्रिटिङले रियाद विमानस्थललाई लक्षित गरिनुले हुथीहरू यस क्षेत्रमा तनाव भड्काउन कुन हदसम्म गइरहेका छन् भन्ने स्पष्ट पारेको बताउँदै थप सैन्य सहयोगको स्वीकृति दिएको उल्लेख गरे। उनले मध्यपूर्व क्षेत्रमा भइरहेको हिंसाले विश्वव्यापी ऊर्जा आपूर्तिमा बाधा पुर्याई आम उपभोक्ता र व्यवसायहरूका लागि लागत बढाएको कुरामा समेत जोड दिएका छन्।
