: नेपाल कम्युनिष्ट पार्टी (नेकपा) का मधेस प्रदेश कमिटी सदस्य प्रभाकर गुप्ता राष्ट्रिय स्वतन्त्र पार्टी (रास्वपा) मा प्रवेश गरेका छन् ।
पर्साको वीरगन्ज महानगरपालिका वडा नम्बर १० घडिअर्वा घर भएका गुप्ता नेकपा परित्याग गरी रास्वपाको सदस्यता लिएर रास्वपामा प्रवेश गरेका हुन् ।दुई दशकभन्दा लामो समयदेखि पुष्पकमल दाहाल नेतृत्वको कम्युनिष्ट पार्टीमा रहेर सक्रिय राजनीति गर्दै आएका गुप्ताले २०६१ सालमा विद्यार्थी राजनीतिबाट आफ्नो राजनीतिक यात्रा सुरु गरेका थिए ।
२०६३ सालमा अखिल (क्रान्तिकारी) को नगर समिति सदस्य, २०६४ सालमा जिल्ला समिति सचिवालय सदस्य तथा २०६६ सालमा ठाकुरराम बहुमुखी क्याम्पसको इकाई कमिटी अध्यक्षको जिम्मेवारी सम्हालेका उनले २०६५ सालमा ठाकुरराम बहुमुखी क्याम्पसको स्वतन्त्र विद्यार्थी युनियन (स्ववियु) को निर्वाचनमा सदस्य पदमा प्रतिस्पर्धा पनि गरेका थिए ।
२०६७ सालमा तत्कालीन नेकपा माओवादी केन्द्रको पर्सा जिल्ला सदस्यमा मनोनित भएका गुप्ता २०६९ सालमा अखिल (क्रान्तिकारी) को १८औँ राष्ट्रिय सम्मेलनबाट केन्द्रीय सदस्यमा मनोनित भएका थिए ।
२०७३ सालमा अखिल (क्रान्तिकारी) केन्द्रीय सचिवालय सदस्य बनेका गुप्ता अखिल (क्रान्तिकारी) को केन्द्रीय सचिवको जिम्मेवारीसमेत सम्हालिसकेका छन् ।‘प्रचण्ड’ नेतृत्वको नेकपाभित्र परिवारवाद, अवसरवाद र गुटगत हाबी भएको तथा इमानदार कार्यकर्ताको मूल्यांकन नभएकाले आफूले नेकपा परित्याग गरी रास्वपामा प्रवेश गरेको गुप्ताले बताएका छन् ।
