: केन्यामा भोकै बसेर ‘येशूलाई भेट्न’ भन्दै आफ्ना अनुयायीलाई उपवास बस्न लगाएको एक धार्मिक सम्प्रदायका नेता पल म्याकेन्जी १९१ जनाको हत्यामा दोषी ठहर भएका छन् । मृतकमध्ये १९० जना बालबालिका रहेको अभियोजन पक्षले जनाएको छ।
बिबिसिमा उल्लेख भए अनुसार म्याकेन्जीले सन् २००३ मा ‘गुड न्युज इन्टरनेशनल मिनिस्ट्रीज’ नामक चर्च स्थापना गरेका थिए । उनले १६ वर्षसम्म चर्च सञ्चालन गर्दै केन्याभरि हजारौँ अनुयायी बनाएका थिए । उनको शिक्षामा औपचारिक शिक्षा निषेधित, आधुनिक चिकित्सा ‘दुष्ट’ र डिजिटल परिचयपत्रलाई ‘शैतानको चिन्ह’ का रूपमा व्याख्या गरिएको थियो ।
अदालतमा प्रस्तुत प्रमाणअनुसार म्याकेन्जीले आफ्ना अनुयायीलाई भोकै बसेर मृत्यु भएपछि येशूलाई भेट्न सकिने विश्वास दिलाएका थिए। उपवास बस्न अस्वीकार गर्नेहरूलाई समेत बल प्रयोग गरेर उपवास बस्न बाध्य पारिएको आरोप छ । उनकी शिक्षाका कारण बालबालिकासमेत भोकमरीको सिकार भएको र कतिपयको अन्य कारणले मृत्यु भएको अभियोजन पक्षको दाबी छ ।
न्यायाधीश डायना मोचाचेले आठ घण्टा लामो फैसला सुनाउँदै अनुयायीहरूले म्याकेन्जीलाई ‘येशूको मुखपत्र’ का रूपमा विश्वास गर्ने गरेको बताइन् । सम्प्रदायका अन्य २९ जना नेतासमेत हत्याको अभियोगमा दोषी ठहर भएका छन्। उनीहरूले भने आफूहरू निर्दोष रहेको दाबी गर्दै आएका थिए ।
केन्याको तटीय क्षेत्रनजिकै रहेको शाकाहोला जंगलमा ४०० भन्दा बढी शव उथले चिहानमा फेला परेका थिए। सन् २०२३ मा स्थानीय गोठालाहरूले पहिलो अवशेष फेला पारेपछि घटनाको भयावह पक्ष सार्वजनिक भएको थियो। मृतकमध्ये धेरैजसोको पहिचान अझै खुल्न सकेको छैन ।
म्याकेन्जीका पूर्व अनुयायी स्टीफन म्वितीले आफ्ना छ जना छोराछोरी गुमाएको बताएका छन्। उनले छोराछोरीको मृत्युले आफू गहिरो पीडामा परेको बताउँदै म्याकेन्जीप्रति आक्रोश व्यक्त गरेका छन्। उनले आफ्ना छोरा शमूएलको अवशेष मात्रै फेला पारेर अन्त्येष्टि गर्न सकेको बताए ।
त्यस्तै, पिटर शुक्रानीले जंगलमा बस्दा बिरामी भएपछि औषधि प्रयोग गर्न नपाएको र उपचारबाट वञ्चित हुँदा आफ्नो अवस्था गम्भीर बनेको बताएका छन् । सन् २०२३ को मार्चमा उद्धार गरिएका उनी भन्छन्, जंगलबाट उद्धार नगरिएको भए आफ्नो पनि मृत्यु हुन सक्थ्यो। यद्यपि, उनले अझै पनि म्याकेन्जीलाई असल व्यक्ति र आफ्नो पादरी मान्ने गरेको बताएका छन् ।
म्याकेन्जीका छोरा डान पल म्याकेन्जीले भने आफ्ना बुबा सम्प्रदायका नेता भएकाले सामूहिक हत्याको जिम्मेवारी लिनुपर्ने बताएका छन् ।
म्याकेन्जी र उनका अनुयायीहरूले आतंकवाद, कट्टरपन्थीकरण तथा बालबालिकालाई शिक्षाबाट वञ्चित गरेको लगायतका अन्य मुद्दासमेत सामना गरिरहेका छन् । हत्याको अभियोगमा आएको यो फैसला घटनाको न्यायिक प्रक्रियामा महत्त्वपूर्ण मानिएको छ ।
