: फ्रान्समा जारी हिंसात्मक प्रदर्शनका बीच अमेरिकी राष्ट्रपति डोनाल्ड ट्रम्पले आप्रवासनलाई यसको मुख्य जिम्मेवार ठहराएका छन्। साथै उनले फ्रान्सलाई आफ्नो सीमा तत्काल बन्द गर्न र आप्रवासन सम्बन्धी नियमहरू कडा बनाउन अपिल गरेका छन्।
सामाजिक सञ्जाल 'ट्रुथ सोसल'मा लेख्दै ट्रम्पले भनेका छन्, 'फ्रान्स जलिरहेको छ। फरक संसारबाट आएका र हृदयमा घृणा बोकेका मानिसहरूको आप्रवासनले कुनै समय महान् रहेको यो देशलाई विनाशको दिशामा पुर्याएको छ।' उनले स्थिति पूर्ण रूपमा नियन्त्रण बाहिर जानुअघि नै फ्रान्सलाई सीमा सुरक्षित गर्न चेतावनी दिएका छन्।
ट्रम्पको अभिव्यक्तिअघि अमेरिकी उपराष्ट्रपति जेडी भेन्सले पनि उस्तै प्रतिक्रिया दिँदै पश्चिमी उदारवादीहरूलाई यसको जिम्मेवार ठहराएका थिए। भेन्सले सामाजिक सञ्जालमा लेखेका छन्, 'पश्चिमी उदारवादीहरूले विविधता र करुणाका नाममा विकासशील देशका मानिसहरूलाई फ्रान्स र अन्य मुलुकहरूमा ल्याएर राखे। उनीहरूले समाजमा घुलमिल हुने र अनुकूलन जस्ता आधारभूत विषयहरूलाई बेवास्ता गरे।'
उनले अगाडि थपेका छन्, 'म प्रार्थना गर्छु कि फ्रान्सले समयमै यो पागलपन रोकोस्, ताकि त्यहाँका बाँकी ऐतिहासिक तथा महत्त्वपूर्ण स्थलहरू ध्वस्त हुनबाट जोगियून्।' आगामी नोभेम्बर ३ मा हुने मध्यावधि निर्वाचनको पृष्ठभूमिमा भेन्सको यो बयानलाई राजनीतिक वृत्तमा महत्त्वका साथ हेरिएको छ।
फ्रान्समा जारी प्रदर्शनका कारण ठूलो मात्रामा भौतिक क्षति भएको छ। प्रदर्शनकारीहरूले एक १४३ वर्ष पुरानो ऐतिहासिक टाउनहलमा आगजनी गरिदिएका छन्। अहिलेसम्म प्रहरीले १,८०० भन्दा बढी प्रदर्शनकारीहरूलाई नियन्त्रणमा लिइसकेको छ।
यस घटनाले फ्रान्सेली राष्ट्रपति इमानुएल म्याक्रोनमाथि ठूलो राजनीतिक दबाब सिर्जना गरेको छ। म्याक्रोनको कार्यकाल सकिन र आगामी निर्वाचन हुन अब मात्र ६ महिना बाँकी छ।
