— नेपाल प्रिमियर लिग (एनपीएल) क्रिकेटको तेस्रो संस्करणमा ८ जनासम्म विदेशी खेलाडी खेल्न पाउने भएका छन् । अन्तर्राष्ट्रिय क्रिकेट परिषद् (आईसीसी) ले शुक्रबार एनपीएललाई स्वीकृति प्रदान गरेपछि नेपालको प्रमुख क्रिकेट प्रतियोगितामा खेल्ने विदेशी खेलाडीको दायरा बढेको हो ।
यसअघिको दुई संस्करणमा एउटा फ्रेन्चाइज टोलीले कम्तीमा ४ र बढीमा ६ विदेशी खेलाडी टिममा राखेर खेलाउँदै आएका थिए । त्यसमा बढीमा ४ खेलाडीले प्लेयिङ ११ मा खेल्न पाउँथे । तर एनपीएललाई आईसीसीको मान्यतापछि अब एउटा फ्रेन्चाइज टोलीले बढीमा ८ विदेशी खेलाडी राख्न पाउने छन्, त्यसमा एक एसोसिएट राष्ट्रको हुनु पर्ने अनिवार्य रहेको छ । प्लेयिङमा भने ४ विदेशी खेलाडीले नै खेल्ने छन् ।
अन्तर्राष्ट्रिय क्रिकेटबाट संन्यास लिइसकेका खेलाडीले भने सम्बन्धित देशको बोर्डको स्वीकृति लिनु पर्ने भएको खड्काले जानकारी गराए । आईसीसीको मान्यता नदिएको वा सम्बन्धित देशको घरेलु बोर्डले अनुमोदन नगरेको प्रतियोगिता खेलेका खेलाडीले एनपीएल खेल्न पाउने छैनन् ।
नेपाल क्रिकेट संघ (क्यान) का सचिव पारस खड्काले शनिबार आयोजित पत्रकार सम्मेलनमा एनपीएललाई आईसीसीको मान्यता प्राप्त दिएअनुरुप आईसीसीका पाँच बुँदे सर्तलाई पालना गर्नु पर्नेछ । सो अनुरुप प्रतियोगिता सकिएको ६० दिनभित्र समीक्षा गरी त्यसको रिपोर्ट आईसीसीलाई बुझाउनु पर्नेछ ।
साथै एन्टी करपसन युनिट (एसीयु) को आचरण उल्लंघन गर्दै फिक्सिङ, स्पट फिक्सिङ लगायतमा पाइएमा त्यसमा नेपालको प्रचलित भ्रष्टाचारविरोधी कानुनका साथै आईसीसी अन्तर्गतको अन्तर्राष्ट्रिय कानुन पनि आकर्षित हुने सचिव खड्काले जनाए । एउटा टोलीमा घरेलु टिमका ७ खेलाडील प्लेयिङमा रहेर खेल्ने छन् । एनपीएलको तेस्रो संस्करण कार्तिक ९ गतेबाट सुरु हुँदैछ । त्यसमा ८ फ्रेन्चाइज टोलीले प्रतिस्पर्धा गर्नेछन् ।
आईसीसीको मान्यता पनि एनपीएलले टी–२० को आधिकारि मान्यता पाउन अझ पर्खनु पर्ने भएको छ । त्यो मान्यता पनि पाउने विश्वास व्यक्त गर्दै खड्काले यसबारे सोमबारसम्म आधिकारिक निर्णय सार्वजनिक हुने बताए । एनपीएलमा कमेन्ट्रीका लागि पूर्व अन्तर्राष्ट्रिय खेलाडी ल्याउने तयारी भइरहेको जनाए ।
पारसले आईसीसीका अध्यक्ष जय साहले पनि एनपीएललाई मान्यता प्रदान गर्न ठुलो भूमिका खेलेको जनाए । आईसीसी एसिया कन्फ्रेन्स आगामी मंसिर १ देखि ३ सम्म नेपालमा आयोजना हुँदैछ र त्यसमा आईसीसी तथा भारतीय क्रिकेट बोर्डका अध्यक्ष साहसहितको टोली काठमाडौं आउने छन् र एनपीएलका खेलहरु पनि हेर्ने छन् । पारसले यसलाई नेपाललाई आतिथ्यता प्रदान गर्ने अवसरको रुपमा लिएको जनाए ।
