: नुवाकोटमा भोटेकोशी बाढी प्रभावित ३ सय ५० महिलालाई पोषण तथा स्वास्थ्य सामग्री वितरण गरिएको छ।
सामुदायिक विकास केन्द्र (सीडीसी) नेपाल र नेपाल सहायता फाउन्डेसनले प्रभावित क्षेत्रका गर्भवती तथा सुत्केरी महिलाहरुलाई विभिन्न पोषणयुक्त सामग्री र न्यायो कपडा वितरण गरेको हो। यस्तै, १ सय ५० बालबालिकाहरुलाई पनि न्यायो कपडा र खेलौना वितरण गरिएको सीडीसी नेपालकी अध्यक्ष राधा मताङ्गीले जानकारी दिइन्। इनारपाटी स्वास्थ्य चौकी,गेर्खु स्वास्थ्य चौकी, बट्टार घण्टाघर स्वास्थ्य केन्द्र, त्रिशूली अस्पताल र वाणाको चौतारो अस्थायी आवासमा बसोबास गरिरहेका गर्भवती तथा सुत्केरीहरुलाई पोषण, सरसफाई तथा स्वास्थ्य सामग्रीहरु हस्तान्तरण गरिएको उनले बताइन्।
दसैँको अवसरमा प्रदान गरिएको उक्त सहयोगले विपद्पछि कठिन परिस्थितिमा रहेका गर्भवती तथा स्तनपान गराउने आमाहरूलाई सहयोग पुग्ने अपेक्षा गरिएको छ।
