: नवरात्रको सातौं दिन आज दसैं घर वा पूजा कोठामा नौ दुर्गामध्येकी सातौं देवी कालरात्रिको विधिपूर्वक पूजा-आराधना गरिँदै छ।
प्रत्येक वर्ष आश्विन शुक्ल सप्तमी अर्थात् दुर्गा पक्षको सातौं दिन कालरात्रिको पूजा गर्ने वैदिक सनातनी परम्परा छ। प्राणीमात्रलाई नष्ट गर्ने काललाई समेत भगवती देवीले परास्त वा नष्ट गरिदिन्छिन् भन्ने धार्मिक मान्यता रहिआएको छ। कालरात्रिको वर्ण कृष्ण (कालो) रहेको र स्वरूप भयङ्कर हुने कुरा विभिन्न पौराणिक ग्रन्थहरूमा उल्लेख छ।
यस वर्ष आश्विन १५ गते आइतबार दसैं घर वा पूजा कोठामा वैदिक विधिअनुसार घटस्थापना गरी जौंको जमरा राखिएको थियो। सोही दिन पहिलो देवी शैलपुत्रीको आह्वान गरी पूजा-आराधना गरिएको थियो।
त्यस्तै, दोस्रो दिन ब्रह्मचारिणी, तेस्रो दिन चन्द्रघण्टा, चौथो दिन कुष्माण्डा, पाँचौं दिन स्कन्दमाता र छैटौं दिन कात्यायनी देवीको विधिपूर्वक पूजा गरियो। सातौं दिन आज कालरात्रि देवीको आराधना गरिँदै छ भने बाँकी दिनहरूमा क्रमशः आठौं दिन महागौरी र नवौं दिन सिद्धिदात्रीको पूजा गरिन्छ। यिनै नौ स्वरूपलाई नवदुर्गा भनिन्छ।
नवरात्रभर दुर्गा सप्तशती (चण्डी) र श्रीमद्देवीभागवत लगायत देवी स्तोत्रहरूको पाठ गरिन्छ। यस अवसरमा देवीको आराधना गर्नाले शक्ति, ऐश्वर्य र विद्या प्राप्त हुने जनविश्वास छ। नवमीसम्म पूजा गरिएको प्रसाद विजयादशमीदेखि कोजाग्रत पूर्णिमासम्म लगाउने परम्परा अनुसार नेपालीहरूले १५ दिनसम्म बडादसैं पर्व मनाउँछन्।
दसैंको सातौँ दिन आज घरघरमा वैदिक विधिअनुसार फूलपाती भित्र्याइँदै छ। यसैक्रममा आज हनुमानढोका दरबारको दसैँ घरमा पनि गोरखाबाट ल्याइएको फूलपाती बाजागाजासहित हर्षोल्लासका साथ भित्र्याइन्छ। नेपाल पञ्चाङ्ग निर्णायक विकास समितिले यस वर्ष फूलपाती भित्र्याउनका लागि बिहान ७ बजेर ३७ मिनेटको शुभ साइत तोकेको छ।
साथै, आजैका दिन ऐतिहासिक तुलजा भवानीको जात्रा पनि विधिपूर्वक मनाइन्छ। नवरात्रको यस विशेष अवसरमा काठमाडौँ उपत्यकालगायत देशभरका प्रमुख शक्तिपीठहरूमा बिहानैदेखि दर्शनार्थी भक्तजनहरूको ठूलो घुइँचो लागेको छ।
