:भारतबाट भन्सार छलेर ल्याउँदै गरेको अवस्थामा नवलपरासीबाट करिब १५ लाख बराबरको मदिरा बरामद भएको छ । सीमावर्ती नाका सुस्ता गाउँपालिका-५ स्थित महलबारीबाट ओेल्ड मङ्क नाम गरेका ७४२ बोत्तल रम बरामद भएको जिल्ला प्रहरी कार्यालयका सूचना अधिकारी डीएसपी मदन थापाले जानकारी दिए ।
७५० एमएलका उक्त रमको प्रति बोत्तल २ हजारका दरले कूल १४ लाख ८४ हजार मूल्य कायम गरेर आवश्यक कारबाहीका लागि महेशपुर भन्सार कार्यालय पठाइएको प्रहरीले जनाएको छ । लुम्बिनी प्रदेश प्रहरी कार्यालय र बेलाटारी तथा रामनगर प्रहरी चौकीको टोलीले बरामद गरेको मदिरा ११ वटा ठूला झोलामा फेला परेको जनाएपनि संलग्न व्यक्ति भने फेला नपरेको डीएसपी थापाले बताए ।
चाडपर्व नजिकिएसँगै जिल्लाका नाकाबाट भारतबाट मात्र होइन नवलपरासीबाट समेत भारततर्फ अवैध ओसारपसार कार्य बढी रहेको स्थानीयले बताएका छन् । यता अवैध कार्य नियन्त्रणका लागि प्रहरीले नाकामा निगरानीसँगै गस्ती कार्यलाई बढाएको दाबी गरेको छ ।
