: सिन्धुपाल्चोकको जिल्ला विपद् जोखिम न्यूनीकरण तथा व्यवस्थापन समितिले भोटेकोशी र त्रिशूली नदीमा आएको विनाशकारी बाढीका कारण बेपत्ता भएका नागरिकहरूको आधिकारिक सूचीकरण गर्ने निर्णय गरेको छ ।
बैठकले विपद्बाट प्रत्यक्ष प्रभावित भएका परिवारहरू पहिचान गरी उनीहरूलाई तत्काल राहत तथा पुनर्स्थापनाका कार्यक्रमहरूमा समावेश गर्न लाभग्राही सूचीकरण गर्ने निर्णय गरेको हो। जिल्लालाई विपद् सुरक्षित बनाउने र भर्खरैका प्राकृतिक विपत्तिबाट सिर्जित समस्याहरू समाधान गर्ने उद्देश्यका साथ बैठक आयोजना गरिएको जिल्ला विपद् जोखिम न्यूनीकरण तथा व्यवस्थापन समितिका अध्यक्ष एवम् प्रमुख जिल्ला अधिकारी शशीधर घिमिरेले जानकारी दिए।
बैठकमा विज्ञहरूको विशेष प्रस्तुतिसहित जिल्लाको समग्र जोखिम विश्लेषण, जोखिम न्यूनीकरणका उपायहरू र सम्भावित क्षति कम गर्न पूर्वसूचना प्रणाली स्थापना गर्नेबारे गहन छलफल भई निर्णय गरिएको उनले बताए । जिल्लाको विपद् व्यवस्थापनलाई प्रभावकारी बनाउन आयोजित उक्त बैठकमा विभिन्न क्षेत्रका प्रमुख जनप्रतिनिधि तथा प्रशासनिक अधिकारीहरूको उपस्थिति रहेको थियो।
बैठकमा सिन्धुपाल्चोक प्रतिनिधिसभा क्षेत्र नम्बर १ का सांसद भरतप्रसाद पराजुली, क्षेत्र नम्बर २ का सांसद युवराज दुलाल, जिल्ला समन्वय समिति सिन्धुपाल्चोकका प्रमुख बालकृष्ण श्रेष्ठ, चौतारा साँगाचोकगढी नगरपालिकाका नगर प्रमुख कृष्णप्रसाद सापकोटा, प्रमुख जिल्ला अधिकारी शशीधर घिमिरे र जिल्ला प्रहरी प्रमुख काजीकुमार आचार्यलगायत विभिन्न क्षेत्रका सरोकारवालाहरूको सहभागिता रहेको थियो ।
बैठकमा सहभागीहरूले सिन्धुपाल्चोक भौगोलिक रूपमा विपद्को उच्च जोखिममा रहेको चर्चा गर्दै स्थानीय तह, प्रदेश र केन्द्र सरकारबीचको समन्वयमा पूर्वतयारी तथा पुनर्निर्माणका कार्यहरूलाई तीव्रता दिनुपर्नेमा जोड दिएका थिए ।
