यमनमा चर्किंदो द्वन्द्वका कारण ८ लाख मानिस जीवनरक्षक खाद्य सहायताबाट वञ्चित भएको संयुक्त राष्ट्रसंघीय विश्व खाद्य कार्यक्रम (डब्लूएफपी) ले चेतावनी दिएको छ । युद्धका अग्रपंक्ति निरन्तर परिवर्तन हुनु, सडक अवरुद्ध हुनु र सुरक्षा अवस्था बिग्रिनुले प्रमुख क्षेत्रमा राहत सामग्री पुर्याउन कठिन भएको कार्यक्रमले जनाएको छ ।
डब्लूएफपीका अनुसार यमनको तेस्रो ठूलो सहर ताइजमा संकट सबैभन्दा गम्भीर छ । त्यहाँ जारी युद्ध र सडकहरू बन्द हुने जोखिमका कारण हजारौँ विस्थापित परिवार बसोबास गर्ने क्षेत्रहरूमा राहतकर्मीको पहुँच पूर्ण रूपमा अवरुद्ध भएको छ ।
ताइजमा मात्रै ६ लाखभन्दा बढी मानिस खाद्य सहायताबाट वञ्चित भएका छन् । उनीहरूमध्ये करिब २ लाख महिला तथा बालबालिका रहेको डब्लूएफपीले जनाएको छ । यमनको पश्चिमी तटीय क्षेत्रमा पनि पछिल्लो समय राहत पहुँच अवरुद्ध भएको छ ।
खाद्य संकट गहिरिँदै गएका क्षेत्रमा पिठोको मौज्दात सकिन थालेको छ भने स्थानीय बजारमा खाद्यान्नको उपलब्धता घट्दै गएको छ । यसले मानवीय संकट भयावह अवस्थामा पुग्ने जोखिम बढाएको छ ।
डब्लूएफपीका अनुसार यमनभर १ करोड ८० लाखभन्दा बढी मानिससँग पर्याप्त खाना छैन । पछिल्लो अनुगमनले राहतकर्मीको पहुँच भएका क्षेत्रका ७४ प्रतिशत परिवारले समेत दैनिक खाद्य आवश्यकता पूरा गर्न नसकेको देखाएको छ। यो अहिलेसम्मकै उच्च अनुपात हो ।
