: दशैं–तिहार लगायतका चाडपर्वहरुलाई लक्षित गर्दै स्याङ्जाका विभिन्न तीन ठाउँमा यात्रु सहायता कक्ष स्थापना गरिएको छ।
चाडपर्वका बेला आम नागरिकहरुको सहज यात्राका लागि जिल्ला प्रहरी कार्यालय र ट्राफिक प्रहरी कार्यालय स्याङ्जाको सहकार्य जिल्लाका विभिन्न तीन ठाउँमा यात्रु सहायता कक्ष स्थापना गरिएको हो। जिल्लाको पुतलीबजार, वालिङ र गल्याङ् नगरपालिकाका मुख्य बजारमा यात्रु सहायता कक्ष स्थापना गरिएको जिल्ला प्रहरी कार्यालयका प्रमुख, प्रहरी उपरीक्षक रंजितसिंह राठौरले जानकारी दिए।
चाडपर्वका समयमा यात्रुको चाप बढ्ने र सार्वजनिक यातायातमा आउन सक्ने समस्यालाई मध्यनजर गर्दै मुख्य बजारमा सहायता कक्ष स्थापना गरिएको उनको भनाइ छ। तोकिएकोभन्दा बढी भाडा लिएमा, क्षमताभन्दा बढी यात्रु चढाएमा र यात्राका क्रममा अर्मयादित व्यवहार भोग्नुपर्ने समस्या आइपरेमा सहायता कक्षमा जानकारी गराउन सकिने छ। ‘जस्तासुकै समस्यामा परे पनि हामीलाई खबर गरेमा तत्काल कानुनी उपचारको बाटोमा जान्छौ,’ स्याङ्जाका प्रहरी प्रमुख राठौरले भने।
लामो दूरीका सवारीसाधनमा यात्रुको सुरक्षालाई ध्यान दिँदै चालक र सहचालकको लापसे तथा मापसे जस्ता परीक्षण गरिँदै आएको छ। प्रहरीले सवारी साधन र लाइसेन्स चेकजाँच, चालकको गतिविधि, ट्राफिक नियमको पालनाबारे कडाई गरेर आवश्यक जरिवाना गर्दै आएको ट्राफिक प्रहरीका प्रहरी नायब निरीक्षक नरेन्द्रबहादुर शाहीले जानकारी दिए।
