। आइतबार बुढीगण्डकी नदीमा आएको बाढीले त्यस क्षेत्रको पदयात्रामा रहेका स्वदेशी तथा विदेशी सबै पर्यटक सुरक्षित रहेका छन् ।
मनास्लु संरक्षण क्षेत्र आयोजनाका अनुसार पदमार्गमा भने क्षति पुगेको छ । बाढी प्रभावित क्षेत्रमा अड्किएका मानिसको उद्धारको काम नेपाल सरकारको सहयोगमा भइरहेको छ । चुम भ्याली पदयात्रा अस्थायी रूपमा स्थगित गरिएको छ ।
सार्दीभिरमा रहेको क्यान्टिलिभर झोलुङ्गे पुल पूरै बगेको छ । जसले गर्दा उक्त पदमार्ग अवरुद्ध हुन पुगेको हो । माछाखोलादेखि जगतसम्मको बाटोका धेरै स्थानमा पदमार्ग क्षतिग्रस्त बनेको छ ।
यस क्षेत्रको सोती, खोर्लाबेँसी, तातोपानी, यारु बगर र जगत बगरमा पदमार्गमा क्षति पुगेको छ । सल्लेरी क्षेत्रको पदमार्ग समेत क्षतिग्रस्त बनेको छ ।
उता, लार्केपास जान चाहने पदयात्रीले भने हेलिकप्टरबाट सिधै फिलिमसम्म जान सक्ने विकल्प छ । फिलिमदेखि लार्के पाससम्मको पदमार्ग खुला र सुरक्षित अवस्थामा छ । तर, माछाखोलादेखि जगतसम्म र सल्लेरी भएर जाने पदमार्ग भने क्षतिग्रस्त बनेको छ । आयोजनाले क्षतिग्रस्त पदमार्ग पुनर्निर्माण गर्न सम्बन्धित निकायसँग समन्वय गरिरहेको जनाएको छ ।
मौसमको अवस्था र क्षतिका आधारमा प्रभावित पदमार्ग मर्मत गरी पुन: सञ्चालनमा ल्याउन समय लाग्ने देखिएको छ । साथै, आयोजनाले अर्को सूचना जारी नभएसम्म चुमभ्याली पदयात्रा स्थगि गर्नसमेत सूचित गरेको छ । क्षतिग्रस्त स्थानबाट बाटो र नदी पार नगर्न समेत सचेत गराइएको छ ।
