: श्रम, रोजगार तथा सामाजिक सुरक्षामन्त्री रामजी यादवले दक्ष जनशक्तिको अभाव देशको प्रमुख चुनौती भएको बताएका छन्।
भक्तपुरको सूर्यविनायक–४, दधिकोटमा स्थापना गरिएको ‘एभरेस्ट मल्टी स्किल’को आइतबार उद्घाटन गर्दै मन्त्री यादवले बजारको मागअनुसार सीपयुक्त जनशक्ति उत्पादन हुन नसक्दा बेरोजगारी बढेको बताए। “बजारले खोजेको सीप र हामीले उत्पादन गरिरहेको जनशक्तिबिचको अन्तर नै अहिलेको प्रमुख चुनौती हो। एकातर्फ युवाहरू बेरोजगारी भोगिरहेका छन् भने अर्कातर्फ उद्योग, निर्माण, पर्यटन, कृषि, सूचना प्रविधि तथा सेवा क्षेत्रमा दक्ष जनशक्तिको अभाव भइरहेको छ,” उनले भने।
सीपमूलक तालिम दिने निजी संस्थाहरूले सरकारलाई नै सघाइरहेकाले दक्ष जनशक्ति उत्पादनमा निजी क्षेत्रको लगानीको उनले खुलेर प्रशंसा समेत गरे। सरकारको ध्यान पनि युवाहरूलाई दक्ष बनाउनेतर्फ केन्द्रित रहेको उनले दाबी गरे।
कार्यक्रममा भक्तपुर क्षेत्र नं. २ का प्रतिनिधि सभा सदस्य राजीव खत्रीले परम्परागत पेसा र व्यवसायमा संलग्न नागरिकहरूको सीप परीक्षण गरी प्रमाणपत्र दिनुपर्नेमा जोड दिए। 'मध्यपुर थिमिका कुम्हाले समुदाय माटोका भाँडा बनाउने काममा निपुण छन्, उनीहरूको सीपलाई राज्यले प्रमाणित गर्न ढिला गर्नुहुँदैन,' उनले भने।
