: पृथ्वी राजमार्गअन्तर्गत धादिङको गजुरी गाउँपालिका-५ गलौँदीमा भासिएको सडकको विकल्पमा नयाँ ट्र्याक निर्माण गरी सवारी आवागमन सुचारु गरिएको छ। तर, सवारीसाधनको अत्यधिक चाप र कमजोर ट्राफिक व्यवस्थापनका कारण यात्रु र चालकले भने सास्ती खेप्नुपरेको छ।
त्रिशूली नदीको कटानका कारण सडक भासिएपछि शुक्रबारदेखि अवरुद्ध भएको राजमार्गमा शनिबार मध्यराति नयाँ ट्र्याकबाट रोकिएका सवारीसाधन पास गराइएको थियो। त्यसपछि सवारीसाधन गन्तव्यतर्फ जान थालेका हुन्।
नयाँ ट्र्याकबाट सवारी आवागमन सुरु भए पनि गलौँदी क्षेत्रमा सवारीसाधनको चाप अत्यधिक छ। सवारी व्यवस्थापन प्रभावकारी हुन नसक्दा लामो समय जाममा बस्नुपरेको र यात्रा असहज भएको यात्रुहरूको गुनासो छ। राजमार्ग सुचारु भए पनि सहज रूपमा यात्रा गर्न नपाएको उनीहरूले बताएका छन्। नागढुंग-नौबिसे-मुग्लिन सडक आयोजना पूर्वी खण्डका प्रमुख गुरु प्रसाद अधिकारीका अनुसार नयाँ ट्र्याकबाट सवारीसाधन सञ्चालनमा आए पनि सडकलाई पूर्ण रूपमा व्यवस्थित गर्न थप काम गर्नुपर्नेछ।
भासिएको सडक मर्मतका लागि आइतबार बिहान साढे ८ बजेदेखि दिनभर राजमार्ग बन्द गरेर काम गर्ने तयारी गरिएको थियो। ब्याक कटिङ गरेर निकालिएको माटो पन्छाउने, सडकलाई चौडा बनाउने र ग्राभेल गर्ने काम अझै बाँकी रहेको आयोजनाले जनाएको छ।
त्रिशूली नदीको कटानले सडकको केही भाग भासिएपछि पृथ्वी राजमार्ग हुँदै यात्रा गर्ने हजारौँ यात्रु प्रभावित भएका थिए। नयाँ ट्र्याक निर्माण गरी सवारीसाधन पास गराउन थालिए पनि सवारी चापअनुसार ट्राफिक व्यवस्थापन हुन नसक्दा यात्रुले थप सास्ती भोग्नुपरेको छ।
