: बाराको अमलेखगञ्जमा पिकअप गाडीको ठक्करबाट आइतबार बिहान एक वृद्धको मृत्यु भएको छ। मृत्यु हुनेमा जीतपुरसिमरा उपमहानगरपालिका–२२ का करिब ६७ वर्षीय रामबहादुर थिङ्ग रहेका छन्।
पथलैयाबाट हेटौंडातर्फ जाँदै गरेको प्र २-०३-००१ च १७७७ नम्बरको गाडीले थिङ्गलाई ठक्कर दिएको थियो। उनको घटनास्थलमै मृत्यु भएको हो। उनको शव वीरगन्जस्थित नारायणी अस्पतालमा राखिएको छ।
यता, वृद्धलाई ठक्कर दिएलगत्तै फरार भएको गाडी र चालक महोत्तरीको बर्दिबास नगरपालिका–१४ का ३४ वर्षीय विजयकुमार साह सोनारलाई मकवानपुरको रातेमाटो चेकपोस्टबाट प्रहरीले नियन्त्रणमा लिएको छ। इलाका प्रहरी कार्यालय सिमराका प्रहरी नायब उपरीक्षक दयाकृष्ण भट्ट नेतृत्वको प्रहरी टोलीले फरार भएको गाडीको पहिचान गरी नियन्त्रणमा लिन सफल भएको हो।
यसअघि फरार गाडी पत्ता लगाउन माग राख्दै स्थानीयले अमलेखगञ्जमा सडक अवरुद्ध पारेका थिए। स्थानीयको अवरोधका कारण पथलैया–हेटौंडा सडकखण्ड बिहानैदेखि अवरुद्ध थियो। ठक्कर दिने गाडी पत्ता लागेपछि सडक सुचारु भएको छ।
