: कपिलवस्तुमा प्रहरीले लागूऔषध ब्राउन सुगरजस्तो देखिने पदार्थसहित दुई जनालाई पक्राउ गरेको छ।
जिल्ला प्रहरी कार्यालय कपिलवस्तुका अनुसार बिहीबार राति करिब १२ः३० बजे कृष्णनगर नगरपालिका–२ स्थित कृष्णनगरबाट खटिएको प्रहरी टोलीले कृष्णनगर–मलंगवा अगाडि चन्द्रौटा–कृष्णनगर सडकखण्डमा भारतबाट नेपालतर्फ आउँदै गरेका दुई जनालाई चेकजाँच गर्ने क्रममा लागूऔषधजस्तो देखिने पदार्थ फेला पारेको हो।
प्रहरीले उनीहरूको साथबाट ब्राउन सुगरजस्तो देखिने खैरो गिलो पदार्थ ३७० मिलिग्राम, आइफोन एक्स कम्पनीको एउटा मोबाइल, हिरो कम्पनीको एउटा सादा मोबाइल र १० रुपैयाँका दुई थान नेपाली नोट बरामद गरेको जनाएको छ।
पक्राउ पर्नेमा शिवराज नगरपालिका–५ भगवानपुर निवासी २२ वर्षीय संगम सेन र २३ वर्षीय कृष्ण परियार रहेका छन्।
दुवै जनालाई नियन्त्रणमा लिएर कपिलवस्तु जिल्ला अदालतबाट लागूऔषधसम्बन्धी कसुरमा १५ दिनको म्याद थप गरी अनुसन्धान भइरहेको जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक रिपेन्द्रकुमार सिंहले जानकारी दिएका छन्।
