: नेकपा (एमाले) का महासचिव शंकर पोखरेलले वर्तमान सरकार स्वेच्छाचारी शासन र अधिनायकवादी बाटोमा अगाडि बढ्न खोजिरहेको बताएका छन्।
एमाले बागमती प्रदेश सम्पर्क कमिटीले शनिबार काठमाडौँमा आयोजना गरेको कार्यक्रममा महासचिव पोखरेलले पर्याप्त तथ्य र प्रमाणबिना कसैलाई पक्राउ गर्नु दुःखद भएको बताए। सुरक्षाकै नाममा नियन्त्रणमा लिइएका व्यक्तिसँगको भेटका आधारमा सुरक्षाकर्मीलाई अपदस्थ गर्ने कामले सरकार संविधान र कानुनको बाटोमा नभई स्वेच्छाचारी शासन र अधिनायकवादी बाटोमा अगाडि बढ्न खोजिरहेको प्रस्ट हुने उनको भनाइ छ।
लामो लोकतान्त्रिक संघर्षबाट गुज्रिएको मुलुकलाई स्वेच्छाचारी र अधिनायकवादी शासनतर्फ जानबाट रोक्ने मुख्य जिम्मेवारी एमाले र अन्य राजनीतिक दलहरूको भएको उनको धारणा छ। छिमेकीहरूसँगको सम्बन्धलाई असुरक्षित र असंस्कृत बनाएर सरकार अगाडि बढेमा त्यसको असर देशको सार्वभौमसत्ता र अस्मितामा पर्ने समेत उनले बताए।
उनले पार्टीलाई जनतासँग जोड्नका लागि विगतमा भएका कमी-कमजोरीहरूलाई सुधार गर्दै अघि बढ्नुपर्नेमा जोड दिए।
