: पर्यटक भिसामा नेपाल आएका २४ जना दक्षिण कोरियाली नागरिक मोरङबाट पक्राउ परेका छन्। धार्मिक गतिविधिमा संलग्न रहेको पाइएपछि प्रहरीले शुक्रबार उनीहरुलाई नियन्त्रणमा लिएर अध्यागमन विभागमा पठाएको छ।
उनीहरूमाथि भिसाको सर्त उल्लंघन गरेको आरोपमा अनुसन्धान हुने भएको छ। पक्राउ पर्नेमा १३ पुरुष र ११ जना महिला छन्। उनीहरूलाई विराटनगर विमानस्थलबाट यति एयरलाइन्सको जहाजमार्फत साँझ काठमाडौं पठाइएको मोरङका प्रहरी प्रमुख एसपी कवित कटवालले जानकारी दिए। उनका अनुसार विदेशी नागरिकहरू पर्यटक भिसाको उद्देश्यविपरीत धार्मिक प्रशिक्षण तथा प्रचारप्रसारमा संलग्न भएको सूचना पाएपछि प्रहरीले निगरानी बढाएको थियो।
सुन्दरहरैँचा नगरपालिका–७ मालती मार्गस्थित नेपाल न्यू कोभेनन्ट कलेजमा धार्मिक प्रशिक्षण तथा कार्यक्रम चलिरहेका बेला उनीहरूलाई नियन्त्रणमा लिइएको हो। स्थानीयबाट उजुरी आएपछि उनीहरूको गतिविधिमाथि निगरानी गरिएको प्रहरीले जनाएको छ। निगरानीका क्रममा धर्मशास्त्रको तालिममा उनीहरु संलग्न भएको पाइएको एसपी कटवालले बताए।
मोरङका सहायक प्रमुख जिल्ला अधिकारी सरोज कोइरालाका अनुसार पर्यटक भिसामा आएका विदेशीले धार्मिक शिक्षा, तालिम वा प्रचारप्रसार गर्न नपाउने कानुनी व्यवस्थाविपरीत गतिविधि भएको सूचना प्राप्त भएपछि प्रशासनले दुई दिनदेखि निगरानी गरिरहेको थियो। अनुसन्धानका क्रममा भिसाको उद्देश्यविपरीत काम गरेको देखिएपछि जिल्ला प्रशासन कार्यालयको निर्देशनमा उनीहरूलाई नियन्त्रणमा लिइएको उनले बताए।
पक्राउ परेका कोरियाली नागरिक असोज २० र २१ गते काठमाडौं हुँदै विराटनगर आएका थिए। उनीहरू अक्टोबर १२ सम्म मोरङमा रहने योजनासहित नेपाल आएको बताइएको छ। लभ नेपाल मिसनको सहयोगमा सञ्चालित नेपाल न्यू कोभेनन्ट कलेजमा धर्मशास्त्रको अध्ययन तथा अध्यापन हुँदै आएको छ। उक्त संस्थाले प्रमाणपत्र तहदेखि विद्यावारिधिसम्मको धार्मिक शिक्षा प्रदान गर्ने बताइएको छ।
सहायक प्रजिअ कोइरालाले अध्यागमन नियमावली, २०५१ को नियम २० को उपनियम (२०) अनुसार पर्यटक भिसाको दुरुपयोग गरेको देखिएकाले उनीहरूलाई अध्यागमन विभाग पठाइएको बताए। उनीहरूलाई नेपालबाट निष्कासन गर्ने वा अन्य कानुनी कारबाही अघि बढाउने भन्ने निर्णय विभागले गर्नेछ।
मोरङमा विदेशी नागरिकको आवागमन बढेसँगै उनीहरूको गतिविधिमाथि प्रशासनले निगरानी बढाएको छ। प्रमुख जिल्ला अधिकारीको नेतृत्वमा रहेको अध्यागमन जिल्ला समन्वय समितिले विदेशी नागरिकले भिसाको सर्त पालना गरे–नगरेको विषयमा निगरानी गरिरहेको छ।
यसअघि विराटनगरबाट दुई जना चिनियाँ नागरिक पनि पक्राउ परेका थिए । उनीहरूलाई समेत आवश्यक अनुसन्धानका लागि अध्यागमन विभाग पठाइएको थियो।
