। नेपाली फुटबल टोली फिफा वरीयतामा एक स्थान खस्किएको छ ।
विश्व फुटबलको सर्वोच्च निकाय फिफाले बिहीबार अद्यावधि गरेको वरीयताअनुसार नेपाल एक स्थान खस्किएर १७८औं स्थानमा पुगेको हो ।
नेपालले पछिल्लो पटक खेलेको अन्तर्राष्ट्रिय खेल गत मार्च ३१ मा थियो, जतिबेला नेपाल लाओससँग खेलेर पराजित भएको थियो । त्यो राखेपबाट एन्फा निलम्बनमा परेको ६ दिनपछिको खेल थियो ।
त्यसयता नेपाली फुटबल अन्तर्राष्ट्रिय गतिविधिमा अघि बढ्न सकेको छैन । गत जुन २४ मा भने नेपाल फिफाकै निलम्बनमा परेको थियो ।
दक्षिण एसियाको शीर्षस्थानमा रहेको भारत १३८औं स्थानमा यथावत् छ । भारतले हालैको इन्टरनेशनल ब्रेकमा पानामा, ब्राजिल र उरुग्वेसँग घरेलु मैदानमा नै मैत्रीपूर्ण खेल खेलेको थियो ।
अफगानिस्तान १६८औं, माल्दिभ्स १७३औं, बंगलादेश १८२औं, श्रीलंका १८४औं, भुटान १९२औं तथा पाकिस्तान १९७औं स्थानमा छन् ।
एसियाली टोलीमध्ये शीर्षमा रहेको जापान १७औं स्थानमा छ भने इरान २३औं र अस्ट्रेलिया २६औं स्थानमा छ ।
