: चाडपर्व नजिकिएसँगै विराटनगर र आसपासका बजारमा गरिएको संयुक्त अनुगमनका क्रममा २९ वटा फर्म कारबाहीमा परेका छन् ।
बिल–बिजकबिनै भण्डारण गरिएको ५४० किलो सुपारी बरामद हुनुका साथै तीनवटा औषधि पसलमा सिलबन्दी गरिएको छ । बजार अनुगमनका क्रममा भिसाको दुरुपयोग गरेको आरोपमा दुई जना चिनियाँ नागरिकलाई समेत नियन्त्रणमा लिएर अध्यागमन विभाग पठाइएको छ । जिल्ला प्रशासन कार्यालय मोरङको नेतृत्वमा असोज ९ गतेदेखि विराटनगर महानगरपालिका तथा आसपासका स्थानमा गरिएको संयुक्त बजार अनुगमनका क्रममा ७४ वटा फर्मको निरीक्षण गरिएको थियो ।
तीमध्ये विभिन्न कसुरमा २९ वटा फर्मलाई कुल ६ लाख ९२ हजार रुपैयाँ जरिबाना गरिएको मोरङका सहायक प्रमुख जिल्ला अधिकारी पवनराज कोइरालाले जानकारी दिए । उनका अनुसार अनुगमनका क्रममा विराटनगर–९ स्थित जयराज ट्रेडर्सको गोदाममा बिल–बिजकबिनै राखिएको ५४० किलोग्राम सुपारी फेला परेको थियो । बरामद सुपारी जिल्ला प्रहरी कार्यालय मोरङमार्फत नियन्त्रणमा लिएर आवश्यक कानुनी प्रक्रिया अघि बढाइएको कोइरालाले बताए ।
कर तथा लेखासम्बन्धी मापदण्ड पालना नगर्ने, बिल तथा बिजक जारी नगर्ने, खरिद–बिक्री खाता दुरुस्त नराख्ने तथा करसम्बन्धी अन्य प्रावधान उल्लंघन गर्ने १९ वटा फर्मलाई एक लाख ९२ हजार रुपैयाँ जरिबाना गरिएको छ । उपभोक्ता संरक्षणसम्बन्धी प्रावधान उल्लंघन गर्दै लेबल नभएका, पुनःप्याकेजिङ गरिएका तथा म्याद गुज्रिएका सामग्री बिक्री गर्ने आठवटा फर्मलाई ७५ हजार रुपैयाँ जरिबाना गरिएको छ ।
अनुगमन टोलीले खाद्यान्न, औषधि, होटल तथा रेस्टुरेन्ट, कपडा, जुत्ता–चप्पल, माछा–मासु र दुग्धजन्य पदार्थलगायतका व्यवसायको निरीक्षण गरेको थियो । मापदण्ड पूरा नगरेका तथा आवश्यक नवीकरण नगरेका विराटनगरका इमान फार्मेसी, खुश फार्मेसी र सुरेश फार्मेसीमा सिलबन्दी गरिएको छ । पाँचवटा फर्मलाई भने आवश्यक कारबाहीका लागि सम्बन्धित नियमनकारी निकायमा उपस्थित हुन निर्देशन दिइएको छ ।
बजार अनुगमनकै क्रममा भिसाको दुरुपयोग गरेको आरोपमा दुई जना चिनियाँ नागरिकसमेत नियन्त्रणमा परेका छन् । विराटनगर–९ स्थित योनो ट्रेड सप्लायर्सका सञ्चालक सिए जिङ्सियान र विराटनगर–२ स्थित एभरपिकका सञ्चालक लु जुजियाङले प्राप्त भिसाको उद्देश्यविपरीत कार्य गरेको पाइएपछि प्रहरीमार्फत नियन्त्रणमा लिएर अध्यागमन विभाग, काठमाडौं पठाइएको कोइरालाले जानकारी दिए ।
चाडपर्वका बेला बजारमा हुन सक्ने कालोबजारी, कृत्रिम मूल्यवृद्धि तथा उपभोक्ता ठगी नियन्त्रणलाई लक्षित गरी अनुगमनलाई तीव्रता दिइएको प्रशासनले जनाएको छ । उपभोक्ताको अधिकार संरक्षण, वस्तुको गुणस्तर र मूल्यमा निगरानी, नापतौलको शुद्धता तथा व्यवसायमा पारदर्शिता कायम गर्न बजार अनुगमनलाई निरन्तरता दिइने सहायक प्रमुख जिल्ला अधिकारी कोइरालाले बताए ।
अनुगमनका क्रममा कारबाहीमा परेका अन्य फर्ममा ताण्डव रेस्ट्रो, किरण ट्रेडर्स, ए टु जेट सप्लायर्स, न्यु जय माँ काली होटल, गुरुदेव स्वीट, करिया मिट सप र शान्ती किरानालगायत रहेका छन् ।
