: मोरङको लेटाङ नगरपालिका–७ वारंगी कोलधारीस्थित एक घरबाट प्रहरीले भरुवा बन्दुक र हतियार बनाउने सामग्रीसहित एक जनालाई पक्राउ गरेको छ।
पक्राउ पर्नेमा लेटाङ नगरपालिका–७ का पूर्ण लावती लिम्बू रहेका छन्। उनलाई बिहीबार बिहान करिब ९ बजे भरुवा बन्दुकसहित पक्राउ गरिएको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए। डीएसपी मिश्रका अनुसार लिम्बूले आफ्नै घरमा भरुवा बन्दुक बनाई बिक्री–वितरण गर्ने गरेको विशेष सूचनाका आधारमा इलाका प्रहरी कार्यालय लेटाङको टोलीले उनको घरमा खानतलासी गरेको थियो।
खानतलासीका क्रममा घरभित्र लुकाएर राखिएको अवस्थामा तयारी भरुवा बन्दुक एक थान, दबासवाला बन्दुक एक थान, हतियार निर्माणमा प्रयोग हुने आरन तथा भरुवा बन्दुकका विभिन्न पार्टपुर्जा बरामद गरिएको छ।
पक्राउ परेका लिम्बूलाई इलाका प्रहरी कार्यालय लेटाङको हिरासतमा राखी घटनाका सम्बन्धमा थप अनुसन्धान अघि बढाइएको प्रहरीले जनाएको छ।
