इरानका राष्ट्रपति मसुद पेजेस्कियनले अमेरिकी–इजरायली युद्धबारे रुसी राष्ट्रपति भ्लादिमिर पुटिनसँग फोनवार्ता गरेका छन् ।
फार्स समाचार संस्थाका अनुसार पेजेस्कियनले सो फोनवार्ताका क्रममा अमेरिकासँगको शान्ति सम्झौता सम्भव रहेको पनि बताएका छन् ।
‘यो क्षेत्रमा दीर्घकालीन शान्ति र सुरक्षा सुनिश्चित गर्ने सन्तुलित र निष्पक्ष सम्झौतामा पुग्न इरान पूर्ण रूपमा तयार छ,’ फोनवार्ताका क्रममा पेजेस्कियानले भने, ‘हाम्रो रेडलाइन इरानी जनताको राष्ट्रिय हित र अधिकार हो । यदि अमेरिकाले अन्तर्राष्ट्रिय कानुनी संरचनाको पालना गर्छ भने सम्झौतामा पुग्नु असम्भव छैन ।’
राष्ट्रपति पेजेस्कियनले क्षेत्रीय शान्ति र सुरक्षा कायम गर्न इरान आफ्ना छिमेकी मुलुकहरूसँग सहकार्य गर्न तयार रहेको पनि बताए । उनले यसका लागि क्षेत्रबाहिरका मुलुकको उपस्थिति वा हस्तक्षेप आवश्यक नरहेको धारणा राखे ।
यसैबीच, पुटिनले अमेरिका र इजरायलले युद्धको क्षतिपूर्ति तिर्नुपर्ने र भविष्यमा यस्ता आक्रमण दोहोरिन नदिन इरानलाई दीर्घकालीन सुरक्षा प्रत्याभूति दिनुपर्ने आवश्यकतामा जोड दिएको फार्स न्युजले जनाएको छ ।
